एरिक्सनलाई ब्रेन्टफोर्डको प्रस्ताव

काठमाडौं । इंग्लिस प्रिमियर लिग क्लब ब्रेन्टफोर्डले मिडफिल्डर क्रिस्टियन एरिक्सनलाई अनुबन्धको प्रस्ताव गरेको छ।

द एथ्लेटिक युकेको अनुसार ब्रेन्टफोर्डले एरिक्सनलाई ६ महिनाको सम्झौताका लागि प्रस्ताव गरेको हो ।

डेनमार्कका मिडफिल्डर एरिक्सनले युरोकप फुटबल दौरान भएको हृदयघातपछि फुटबल खेलेका छैनन् ।

उनले हालै इटालियन क्लब इन्टर मिलानसँगको सम्झौता रद्द गरेका थिए ।

मुटुको गति नियन्त्रण गर्ने स्वचालित यन्त्र इम्प्लान्टेबल कार्डियोभर्टर डेफिब्रिलेटर (आइसिडी) नहटाएसम्म इटालीमा खेल्न नपाउने भएपछि एरिक्सन र इन्टरले सम्झौता रद्द गरेको हो ।

हृदयघात भएपछि डेनमार्कका मिडफिल्डर एरिक्सनको शरीरमा आइसिडी  जडान गरिएको छ ।

युरोकपमा फिनल्याण्डविरुद्धको खेल दौरान हृदयघात भएर एरिक्सन मैदानमा ढलेका थिए  ।

मैदानमा ढलेपछि २९ वर्षीय मिडफिल्डरलाई तत्काल मैदानमै सीपीआर दिईएको थियो । जसको कारण उनको ज्यान बचेको थियो ।