मछिन्द्रले एएफसी कपमा ब्लु स्टारसँग खेल्ने

काठमाडौं । एएफसी कप छनोट-२०२२ प्ले अफको पहिलो खेलमा नेपालको मछिन्द्र फुटबल क्लबले श्रीलंकाको ब्लु स्टारविरुद्ध प्रतिस्पर्धा गर्ने भएको छ ।

एसियाली फुटबल महासंघ (एएफसी) को तालिका अनुसार मछिन्द्रले ब्लु स्टारलाई प्रतिद्वन्दी पाएको हो ।

दक्षिण  एसिया क्षेत्रमा रहेको मछिन्द्र र ब्लु स्टारबीचको खेल आगामी अप्रिल ५ मा हुनेछ । खेल दशरथ रंगशालामा हुनेछ ।

यस खेलको विजेताले दोस्रो चरणमा भारतको मोहन बगानसँग खेल्नेछ । जुन खेल अप्रिल १२ मा हुनेछ ।

मछिन्द्र जारी सहिद स्मारक 'ए' डिभिजन लिगको सातौं चरणसम्म लिगको शीर्ष स्थानमा रहदै एएफसी कपमा छनोट भएको हो ।

अखिल नेपाल फुटबल संघ (एन्फा) ले सातौं चरणको शीर्ष टोलीले एएफसी कप छनोट खेलाउन एसियाली फुटबल महासंघ (एएफसी) लाई प्रस्ताव गरेको थियो । जस अनुसार मछिन्द्र छनोट भएको हो ।

मछिन्द्रले पहिलो पटक एएफसी कप छनोट खेल्न लागेको हो ।  अघिल्लो पटक क्लब लाइसेन्स नभएको कारण मछिन्द्रले छनोटको मौका गुमाएको थियो ।

यस पटक भने मछिन्द्रले क्लब लाइसेन्स प्राप्त गरिसकेको छ । मछिन्द्रसहित मनाङ, त्रिभुवन आर्मी र एपीएफले क्लब लाइसेन्स पाएको छ ।

अघिल्लो पटक मछिन्द्रको स्थानमा उपविजेता बनेको आर्मीले एएफसी कप खेलेको थियो ।