छिट्टै राष्ट्रिय टिममा 'कमब्याक' गर्नेछु : विमल

काठमाडौं ।  फरवार्ड विमल घर्ति मगरले आफु चाडै राष्ट्रिय टिममा पुनरागमन गर्ने बताएका छन् ।

आइतबार संचारकर्मीसँग कुरा गर्दै विमलले प्रशिक्षणमा राम्रो गरेर राष्ट्रिय टिममा चाडै पुनरागमन गर्ने बताएका हुन् ।

मछिन्द्र फुटबल क्लबबाट सहिद स्मारक ए डिभिजन लिग खेलिरहेका विमलले आइतबार ब्रिगेड ब्वाइजविरुद्ध दुई गोल समेत गरे ।  यस्तै एक गोलका लागि असिस्ट गरेका थिए ।

'९० मिनेट खेल्न फिट छु । केहि समस्या छैन । राम्रो टिमले गर्दा विस्तारै राम्रो कम ब्याक हुँदैछु,' विमलले खेलपछि भने, 'बन्द प्रशिक्षणमा बोलाउनु भएको छ । ट्रेनिङमा राम्रो गरेर छिट्टै राष्ट्रिय टिममा कमब्याक हुनेछु ।'

घुँडाको चोटबाट मुक्त हुँदै विमल यसै लिगबाट मैदान फर्किएका हुन् । चोटकै कारण विमलले लामो समयबाट राष्ट्रिय टिमबाट खेलेका छैनन् ।

तर, अफ्रिकी राष्ट्र मरिससविरुद्धको मैत्रीपूर्ण फुटबल खेलका लागि डाकिएको बन्द प्रशिक्षणमा विमल अटाएका छन्।

नेपालले दशरथ रंगशालामा मरिसससँग दुई मैत्रीपूर्ण खेल खेल्ने छ । मैत्रीपूर्ण खेल जनवरी २९ र फेब्रुअरी १ मा हुनेछ।

यस्तै विमलले फरक प्रसंगमा आफ्नो बानीब्यहोरा परिवर्तन भएको समेत बताए  ।

 'मान्छे त त्यहि हो । बानीव्यहोरा परिवर्तन भएको छ,' उनले हास्दै भने।