काठमाडौं । मनाङ मर्स्याङ्दी सातदोबाटोविरुद्धको खेलमा पराजित रहनु कसैलाई सबैभन्दा खुसीको समाचार रहेको छ भने त्यो मछिन्द्रका लागि हो ।
डिफेन्डिङ च्याम्पियन मछिन्द्रले सहिद स्मारक लिग ए डिभिजन ०७८ मा आइतबार ब्रिगेड ब्वाइजको सामना गर्नेछ र त्यसमा जित निकाल्न सके, लिग तालिकाको शीर्षमा चार अंकको अग्रता लिन सक्नेछ ।
मछिन्द्रका लागि यो अवसर पनि हो, किनभने लिगका पछिल्ला पाँच संस्करणका तीन खेलमा मछिन्द्र ब्रिगेड ब्वाइजविरुद्ध अपराजित छ ।
वर्ष ०७६ मा मछिन्द्रले २–० को जित निकालेको थियो र त्यसमा गोल गर्ने खेलाडी थिए, योगेश गुरुङ र दीपक राई । वर्ष ०७५ मा यी दुई टिमको खेल गोलरहित बराबरीमा टुंगियो ।
वर्ष ०६८ मा भने मछिन्द्रले फेरि एकपल्ट २–० को जित निकालेको थियो । यसरी तीन खेलमा मछिन्द्र दुईमा विजयी रहेको छ भने एक बराबरीमा टुंगेको छ ।
अहिले तत्काल मछिन्द्रको आठ खेलबाट २० अंक छ । यो दोस्रो स्थानमा रहेको मनाङ मस्र्याङ्दीसँग एक अंकको दूरी हो । ब्रिगेड ब्वाइज भने आठ खेलबाट छ अंकमै सीमित छ र १२ औं स्थानमा रहेको छ ।
