खेलाडीमा कोभिड भएपछि गार्हो भयो : फुजा

काठमाडौं । सहिद स्मारक ‘ए’ डिभिजन लिग फुटबलमा शुक्रबार मनाङ मर्स्याङ्दी क्लब सातदोबाटो युथ क्लबसँग पराजित भयो ।

नवप्रवेशी सातदोबाटोले मनाङलाई २-१ गोल अन्तरले पराजित गरेको हो ।

सातदोबाटोलाई जित दिलाउन मार्टिन एडिल्फे सिलो नाङ्गा र मार्टिन्स अजयीले एक एक गोल गरे ।

मनाङका आफिज ओलावाले ओलादिपोले एक गोल फर्काए ।

सातदोबाटोसँग पराजित भएपछि मनाङका मुख्य प्रशिक्षक फुजा तोपेले खेलाडीमा कोभिड-१९ को संक्रमण भएपछि टिममा समस्या आएको बताए ।

प्रशिक्षक फुजाले आफ्ना ६ खेलाडीमा कोभिड-१९ को संक्रमण देखिएको बताए ।

'हामी यस हप्तामा ठूलो दबाबमा छौं किनभने हाम्रा ६ जना खेलाडीमा कोभिड-१९ संक्रमण देखियो,' उनले भने, 'लिगको यात्रा अझै बाँकी छ । हामीसँग पर्याप्त समय छ र हामी बाँकी खेलहरूमा  राम्रो गर्नेछौं।'