सातदोबाटोसँग मनाङ स्तब्ध

काठमाडौं । सहिद स्मारक ‘ए’ डिभिजन लिग फुटबलमा मनाङ मर्स्याङ्दी क्लब पराजित भएको छ ।

शुक्रबार भएको खेलमा मनाङ नवप्रवेशी सातदोबाटो युथ क्लबसँग २-१ गोल अन्तरले पराजित भएको हो ।

सातदोबाटोलाई जित दिलाउन मार्टिन एडिल्फे सिलो नाङ्गा र मार्टिन्स अजयीले एक एक गोल गरे ।

मनाङका आफिज ओलावाले ओलादिपोले एक गोल फर्काए ।

त्रिपुरेश्वरस्थित दशरथ रंगशालामा भएको रोमान्चक खेलको छैटौं मिनेटमा सातदोबाटोका निरज चौधरीले पेनाल्टी एरियाको ठिक बाहिरबाट प्रहार गरेको बल मनाङका गोलकिपर विशाल सुनारले मुश्किलले बचाए ।

खेलको ११ औं मिनेटमा मार्टिनले गोल गर्दै सातदोबाटोलाई सुरुआती अग्रता दिलाए ।

आकाश बुढा मगरको कर्नरमा सुदिप गुरुङले उपलब्ध गराएको हेड पासमा मार्टिनले हेडमार्फत सहजै गोल गरे ।

निरज चौधरीले ३५ औं मिनेटमा प्रहार गरेको सशक्त बल पोस्ट बार मा लागेर फर्किदा सातदोबाटो अग्रता दोब्बर बनाउन चुकेको थियो ।

खेलको ३८ औं मिनेटमा मार्टिन्सले गोल गर्दै सातदोबाटोलाई २-० गोलको अग्रता दिलाए ।

प्रशान्त अवस्थीको क्रसमा अनमार्क रहेका मार्टिन्सले हेड मार्फत सहज गोल गरे ।

खेलको ५७ औं मिनेटमा ओलावालेले गोल गर्दै मनाङलाई २-१ को स्थितिमा ल्याए ।  पुजन उपरकोटीको कर्नरमा सातदोबाटोका डिफेन्डरले बल क्लियर गर्न नसक्दा उनले सहजै गोल गरे ।

खेलको इन्जुरी समयमा मनाङका कप्तान अन्जन विष्टको प्रहार सातदोबाटोका गोलकिपर अविशेक बरालले बचाए  ।

त्यसपछि दुबै टोलीले थप गोल गर्न सकेनन् र मनाङ सातदोबाटोसँग स्तब्ध भयो ।

सातदोबाटोले कीर्तिमानी आठ पटकको च्याम्पियन मनाङलाई पहिलो पल्ट हराएको हो ।

पहिलो भेटमै सातदोबाटोले मनाङलाई हराएको हो ।

यस जितसँगै सातदोबाटोले ९ खेलमा १२ अंक जोडेको छ ।

सातदोबाटो लिगको छैटौं स्थानमा उक्लिएको छ ।

मनाङले ९ खेलमा १९ अंक जोडेको छ । मनाङ दोस्रो स्थानमा यथावत रहेको छ ।

सातदोबाटोसँगको हारसँगै मनाङको उपाधि होड समेत कमजोर बनेको छ ।

खेलको म्यान अफ दि म्याच सातदोबाटोका प्रशान्त अवस्थी चुनिए ।

इमर्जिङ प्लेयर सातदोबाटोका निरज चौधरी चुनिए ।