काठमाडौं । विश्व क्रिकेटमा अष्ट्रेलियाको 'बिग बास' लिगको छुट्टै पहिचान छ । बिग बास लिग खेल्न टेष्ट राष्ट्रका खेलाडीको समेत सपना हुन्छ ।
एसोसिएट राष्ट्रका खेलाडीले 'बिग बास' लिग खेल्ने सपनै देख्दैनन । कल्पना समेत गर्दैंनन् । तर, एसोसिएट राष्ट्र नेपालका युवा क्रिकेटर सन्दीप लामिछानेले बिग बास खेल्ने सपना पुरा गरेका छन् ।
लेग स्पिनर सन्दीप बिग बास लिगका लागि गत सोमबार मेलबर्न स्टार्समा अनुबन्धित भएका छन् । सन्दीपलाई आगामी डिसेम्बरमा सुरु हुने बिग बासका लागि मेलबर्नले अनुबन्ध गरेको हो । सन्दीपको पारिश्रमिक रकम खुलाईएको छैन । तर, सन्दीपका व्यवस्थापक रमन सिवाकोटीले सन्दीपले कम्तिमा ६० हजार डलर पाउने बताए ।
मेलबर्नसंगको अनुबन्धसंगै सन्दीप एसोसिएट राष्ट्रबाट बिग बास लिग खेल्ने पहिलो खेलाडी बनेका छन् । उनले टेष्ट राष्ट्रका खेलाडीलाई मात खुवाउदै बिग बासमा आफ्नो स्थान पक्का गर्न सफल भएका हुन् ।
विश्व क्रिकेटको कान्छो संस्करण टी-ट्वान्टीमा सन्दीपले कमाल नै गरेका छन् । त्यसैले सन्दीपले क्रिकेट खेलकै माध्यमबाट विश्व यात्रा गरेका छन् । सन्दीपको यात्रा अझै जारी छ । सन्दीप यसरी नै क्रिकेटकै माध्यमबाट विश्व परिक्रमा गरिरहने छन् ।
नेपाली खेलकुदमा युथ आइकन बनिसकेका सन्दीप मात्र १८ बर्षका भए । तर, सन्दीप विश्व खेलकुदमा ठुला नाम बनिसकेका छन् । विश्व क्रिकेटको आधुनिक स्वरूप मानिने इन्डियन प्रिमियर लिग (आईपीएल) बाट विश्व यात्रा सुरु गरेका सन्दीपको यात्रा अफ्रीका हुँदै अष्ट्रेलियासम्म पुगेको छ ।
स्याङ्जाको आरुचौरमा जन्मिएका सन्दीप बाबुआमासँग सानैमा भारतको हरियाणा गए । क्रिकेटको सामान्य ज्ञान भारतमै सिके । तर, सन्दीपले क्रिकेट करिअरको जग नेपालमै बसाए । नवलपरासीमा दिदिको बसेर पढ्दै गर्दा सन्दीपले आफुलाई क्रिकेटमै व्यस्त बनाए ।
त्यसक्रममा सन्दीप चितवनस्थित पूर्वराष्ट्रिय टोलीका कप्तान राजु खड्काको क्रिकेट एकेडमीमा भर्ना भए । पुर्व कप्तान खड्काकै एकेडमीमा प्रशिक्षण गरिरहदा सन्दीपको प्रतिभा नेपाली टोलीका पूर्व प्रशिक्षक पुबुदु दासानायेकेले देखे ।
प्रशिक्षक दासानायेकेले सन्दीपलाई यू-१९ टिमको क्याम्पमा बोलाए । पहिलो पटक नेपाली टोलीमा पर्न सकेनन् । तर, नेपाल बंगलादेशमा सम्पन्न यू-१९ विश्वकपमा छनोट भयो । बंगलादेश विश्वकपका लागि भने सन्दीप टिममा अटाए । त्यसपछि उनको क्रिकेट यात्राले बाटो लिन सुरु गरेको थियो ।
आईसिसी यू-१९ विश्वकपमा बंगलादेशसँग पराजित हुँदै नेपाल क्वाटरफाइनलबाट बाहिरियो । तर, सन्दीप १५ विकेट लिँदै सर्वाधिक विकेट लिने खेलाडीको दोस्रो स्थानमा रहे । त्यसपछि सन्दीपले कहिल्लै पछाडी फर्केर हेर्नु परेन् । सन्दीपले उमेर समूहको खेलसंगै राष्ट्रिय टोलीमा ढोका खोलिरहे ।
यसै क्रममा सन्दीपको भेट पूर्व अस्ट्रेलियन कप्तान माइकल क्लार्कसंग भयो । सन्दीपको उडानमा क्लार्कलाई ‘टर्निङ पोइन्ट’ समेत मानिन्छ । सन्दीप र क्लार्कको भेट हङकङमा भएको थियो । हङकङको घरेलु प्रतियोगिता ‘हङकङ टी–२० ब्लिट्ज २०१६’ का दौरान दुवैको भेट भएको थियो । सन्दीपले क्लार्कसंगै काउलुन क्यान्टोन क्लबबाट खेलेका थिए ।
प्रतियोगिताको दौरान सन्दीपको खेल कौशलबाट प्रभावित भएर क्लार्कले आफ्नो एकेडमीमा प्रशिक्षणको लागि बोलाएका थिए । सन्दीपले क्लार्कको क्रिकेट एकेडमीमा प्रशिक्षण गर्नुका साथै क्लार्कको क्लब वेष्ट्रन सवर्वस डिस्ट्रिक क्लबबाट २०१६–१७ को सिजनको प्रिमियर ग्रेड क्रिकेट लिग खेलेका थिए ।
सन्दीपको थप चर्चा आईपीएलबाटै चुलियो । गत सिजनको आईपीएलमा सन्दीपलाई दिल्ली डेयरडेभिल्सले २० लाख भारतीय रुपैयामा अनुबन्ध गरेको थियो । सुरुवाती खेलमा मैदान उत्रन नपाएका सन्दीपले दिल्लीमा सनसनीपूर्ण डेब्यु गर्दै ३ खेलमा ५ विकेट लिएर तहल्का मच्चाएका थिए । त्यसयता सन्दीप विश्व यात्रामा छन् ।
आईपीएल लगत्तै सन्दीपले क्यानाडामा ग्लोबल टी-ट्वान्टी लिगमा मोन्ट्रियल टाइगर्सबाट खेलेका थिए । क्यानेडियन लिगपछि सन्दीप क्यारेबियन प्रिमियर लिग (सीपीएल) मा ब्यस्त बने । सन्दीप पाँच सय अमेरिकी डलरमा सीपीएल क्लबमा अनुबन्धित भएका थिए । सेन्ट किट्स एन्ड नेभिस प्याट्रियट्सबाट सीपीएलमा सन्दिपले ५ खेल खेल्दै १०६ रन खर्चेर ७ विकेट लिएका थिए ।
यस्तै सन्दीप गत साता सम्पन्न अफगानिस्तान प्रिमियर लिग (एपिएल) क्रिकेटमा नगरहर लिओपार्डसबाट मैदान उत्रिएका थिए । एपिएलमा एक खेल खेलेका सन्दीपले दुई विकेट लिएका थिए ।
अफगानिस्तान प्रिमियर लिगबाट फर्के लगत्तै सन्दीप अहिले पोखरा प्रिमियर लिग (पीपीएल) मा व्यस्त छन् । पीपीएल क्रिकेट शुक्रबारबाट सुरु हुँदैछ ।
पीपीएलमा सन्दीप विराटनगर टाईटन्सका मार्की खेलाडी समेत हुन् । सन्दीप टिम विराटनगरले उद्घाटन खेलमा शरद भेषवाकरको टिम पोखरा पल्टनसंग खेल्नेछ । पीपीएल क्रिकेटपछि सन्दीपले केहि समय विश्राम लिनेछन् । यसबीचमा सन्दीपले नेपाली राष्ट्रिय टोली र नेपालमा आयोजना हुने अन्य लिगहरु खेल्नेछन् ।
बिग बास लिगका लागि सन्दीप आगामी डिसेम्बरमा अष्ट्रेलिया जानेछन् । सन्दीप डिसेम्बर १० मा टिममा सामेल हुनेछन् । बिग बास डिसेम्बर १९ बाट फेब्रुवरी १७ सम्म हुनेछ ।
त्यसबीचमा सन्दीप बंगलादेश प्रिमियर लिग (बिपिएल) खेल्न बंगलादेश आउने छन् । बंगलादेश प्रिमियर लिग जनवरी ५ देखी फेब्रुवरी ८ सम्म हुनेछ । बंगलादेशमा सन्दीपले सिल्हेट सिक्सरबाट खेल्नेछन् ।
बिपिएल सकिएलगत्तै सन्दीप बिग बास लिगको बाँकी खेल खेल्न पुनः अष्ट्रेलिया फर्कनेछन् ।
