काठमाडौं । सहिद स्मारक लिग ए डिभिजन ०७८ का आफ्ना पछिल्ला तीन खेलमा एपीएफले बराबरी खेलेको छ ।
त्यसैले जति बेला प्रतियोगिताको नवौं चरण सुरु हुनेछ र त्यसको पहिलो खेलमा उसले हिमालयन शेर्पाको सामना गर्नेछ, उसले त्यसमा बराबरी चाहने छैन् । तर एपीएफले हिमालयनविरुद्ध लिगका पछिल्ला दुई संस्करणमा बराबरी नै खेलेको छ ।
वर्ष ०७६ मा १–१ र वर्ष ०७५ मा गोलरहित बराबरी भएको थियो । त्यस अगाडि वर्ष ०७० मा भने एपीएफले हिमालयनलाई २–१ ले हराएको थियो ।
यस्तै वर्ष ०६९ मा पनि एपीएफ सजिलै ३–० ले विजयी रह्यो । हिमालयनले वर्ष ०६८ मा माथिल्लो डिभिजनमा डेब्यु गरेको थियो र त्यति बेला उसले एपीएफमाथि ४–० को सनसनीपूर्ण जित निकालेको थियो ।
यसरी दुई टिमबीच अहिलेसम्म पाँच खेल भएकोमा दुईमा एपीएफ र एकमा हिमालयन विजयी रहेको छ । बाँकी दुई खेल बराबरीमा टुंगेको छ ।
एपीएफको आठ खेलबाट सात अंक छ र दसौं स्थानमा छ । हिमालयनको भने आठ खेलबाट ११ अंक छैटौं स्थानमा छ । उसले यसपल्टको आफ्नो पछिल्लो खेलमा थ्री स्टारविरुद्ध हार बेहोरेको थियो ।
