गण्डकीमाथि एपीएफको रोमाञ्चक जित  

काठमाडौं । पीएम कप राष्ट्रिय टी–ट्वान्टी क्रिकेट प्रतियोगिता अन्तर्गत एपीएफ क्लबले लगातार तेस्रो जित दर्ता गरेको छ । 

समूह ‘बी’ अन्तर्गत मुलपानी क्रिकेट मैदानमा गण्डकीलाई दुई रनले पराजित गर्दै एपीएफले तेस्रो जित दर्ता गरेको हो ।

९३ रनको लक्ष्य पछ्याएको गण्डकीले निर्धारित २० ओभरमा ७ विकेट गुमाएर मात्र ९० रन बनाउन सक्यो । 

जितसँगै तीन खेलबाट ६ अंक जोडेको एपीएफ सेमिफाइनल नजिक पुगेको छ । 

एपीएफले यस अघि प्रदेश २ र बागमती प्रदेशलाई पराजित गरेको थियो । 

यता गण्डकीको लगातार दोस्रो पराजय हो । यस अघि गण्डकीले पहिलो खेल प्रदेश २ विरुद्ध २ विकेटले हारेको थियो। 

गण्डकीका लागि कप्तान विपिन खत्रीले सर्वाधिक ३६ रनको योगदान गरेपनि जितका लागि पर्याप्त हुन सकेन । 

विधान श्रेष्ठले २९ रनको योगदान गरे । 

एपीएफका कमल ऐरीले तीन विकेट हात पारे ।

किशोर महतोले दुई तथा अविनाश बोहराले एक विकेट लिए ।  

यस अघि टस जितेर पहिले ब्याटिङ गरेको एपीएफले १८ दशमलब ४ ओभरमा अलआउट हुदै ९२ रन जोड्यो । 

एपीएफका लागि प्रदिप ऐरीले १७ रन जोड्दा आसिफ शेखले १६ रनको योगदान गरे । 

गण्डकीका कमल परियारले सर्वाधिक तीन विकेट हात पारे ।

विशाल पौडेलले दुई विकेट लिए । 

कृष्ण पौडेल, सुवाश भण्डारी र चन्द्र पौडेलले एक–एक विकेट हात पारे ।