पोखरा । बगर भाई खलक एट–ए–साइड अन्तर्राष्ट्रिय भेट्रान्स फुटबल प्रतियोगिता सोमबारदेखि सुरु भएको छ ।
पोखरा टुडिखेलस्थित खेल मैदानमा सुरु भएको उद्घाटन खेलमा पोखरा २० भलामले दिप युनाइटेडलाई २–० गोलले पराजित गरेको छ । भलामका लागि मिलन राना र रमेश बस्नेतले समान १–१ गोल गरे ।
सोमबार नै भएको पोखराको एबिसी क्लव ‘बि’ र चितवन भेट्रान्स बिचको खेलमा चितवन ५–० ले विजयी भएको छ । चितवनको जितमा शिवकुमार श्रेष्ठले २ गोल तथा शिवराज लामा, सुरेन्द्र चौधरी र हर्कराज गुरुङले समान १–१ गोल गरे।
प्रतियोगिताको गण्डकी प्रदेशका यूवा तथा खेलकुद मन्त्री राजीव गुरुङले उद्घाटन गरे । सो अवसरमा पोखराका अग्रज खेलाडी महेश गुरुङलाई सम्मान गरिएको थियो । उनलाई यूवा तथा खेलकुद मन्त्री राजीव गुरुङ, प्रदेश खेलकुद परिषद्का सदस्य सचिव तेजबहादुर गुरुङ र प्रतियोगिताका मुख्य प्रायोजकका रुपमा रहेका स्व.रञ्जित गुरुङका परिवार मेजर खुसीमान गुरुङ ‘एमभिओ’ले सम्मान गरे।
माघ १ गते सम्म सञ्चालन हुने प्रतियोगितामा काठमाण्डौं, विरगंज, हेटौंडा, चितवन, बुटवलका साथै स्थानिय गरी कुल २५ टिमको सहभागिता रहेको संस्थाका अध्यक्ष दिलबहादुर गुरुङले बताए ।
प्रतियोगिता विजेताले टिमले १ लाख ५१ हजार १ सय १ सय ११ र उपाविजेताले नगद ७५ हजार ५ सय ५५ सहित ट्रफी, पदक र प्रमाणपत्र प्राप्त गर्नेछन् । त्यस्तै उत्कृष्ट गोल किपर, उत्कृष्ट डिफेण्डर, उत्कृष्ट मिडफिल्डर र उत्कृष्ट फरवार्डलाई ट्रफी सहित जनही नगद ५ हजार प्रदान गरिने आयोजकले जनाएको छ ।
