फुटबलबाट उम्टिटीले लिए बिदा

काठमाडौं। फ्रान्सका पूर्व डिफेन्डर र सन् २०१८ को विश्वकप विजेता सामुएल उम्टिटीले ३१ वर्षको उमेरमा व्यवसायिक फुटबलबाट सन्न्यास घोषणा गरेका छन्।

गत सिजनपछि फ्रान्सेली लिग क्लब लिल छोडेका उनी त्यसयता क्लबविहीन थिए। सोमबार सामाजिक सञ्जाल इन्स्टाग्राममार्फत उम्टिटीले भने,‘उतार–चढावले भरिएको करिअरपछि अब विदा हुने समय आएको छ। मैले आफ्नो सम्पूर्ण जोश र जाँगरसहित खेलें, मलाई कुनै पश्चाताप छैन।’

बार्सिलोनाबाट उनले दुई ला लिगा उपाधि र तीन कोपा डेल रे जितेका थिए। फ्रान्सका लागि ३१ खेल खेलेका उनले चार गोल गरेका छन्, जसमा २०१८ को विश्वकप सेमिफाइनलमा बेल्जियमविरुद्धको १–० को जितमा निर्णायक हेडिङ गोल पनि समावेश छ।

फ्रान्सका प्रशिक्षक डिडिएर डेसच्याम्प्सले उम्टिटीको योगदानलाई सम्झिँदै भने,‘युरो २०१६ बाट राष्ट्रिय टोलीमा प्रवेश गरेका सामले २०१८ विश्वकप जित्न महत्त्वपूर्ण भूमिका खेले। बेल्जियमविरुद्धको गोल सबैले सम्झिरहनेछन्। उनको राफाएलसँगको साझेदारी, डिफेन्समा देखाएको दृढता र अन्तिम क्षणसम्म खेलेको साहसिक प्रदर्शन प्रेरणादायी थियो।’

उम्टिटी २०१८ को विश्वकप विजेता टोलीबाट सन्न्यास लिने पाँचौं खेलाडी बनेका छन्। यसअघि ब्लेज माटुइडी, अदिल रामी, राफाएल भारेन र स्टीभ मन्डान्डाले सन्न्यास लिइसकेका छन्।

आफ्नो करिअरको सुरुआत लियोनबाट गरेका उम्टिटीले सन् २०१२ मा फ्रेन्च कप जितेका थिए। तर, पछिल्ला वर्षमा लगातार चोटपटकका कारण उनी संघर्षरत रहे। लिलमा पनि उनले थोरै मात्र खेल्न पाए।

उनी भन्छन्,‘लिलमा फर्किनका लागि मैले सबै प्रयास गरें। धेरैलाई थाहा छैन मैले कति संघर्ष गरें, तर मेरो शरीरले साथ दिन सकेन।