'हाम्रो लक्ष्य नै च्याम्पियन बन्ने हो'

काठमाडौं । दुई वर्ष अघि नेपाली महिला भलिबलले ऐतिहासिक उपलब्धि हात पारेको थियो ।

बंगलादेशको ढाकामा आयोजना भएको एभिसी सेन्ट्रल जोन सिनियर महिला भलिबल च्याम्पियनसिपको उपाधि जित्दै महिला भलिबलले ऐतिहासिक उपलब्धि पाएको थियो ।

फाइनलमा माल्दिभ्सलाई ३-० को सोझो सेटमा हराउँदै नेपालले अपराजित रहदै नेपाल च्याम्पियन बनेको थियो । जुन नेपाली महिला भलिबलले पाएको पहिलो अन्तराष्ट्रिय उपाधि थियो ।

यतिबेला नेपाली महिला टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपको तयारी गरिरहेको छ । जुन ढाकामै डिसेम्बर २१ देखि २९ सम्म आयोजना हुँदैछ ।

यस पटक नेपाली टोलीले साविक विजेताको रुपमा प्रतियोगितामा सहभागिता जनाउदैछ ।

नेपाली टिम उपाधि रक्षा गर्ने योजनासहित ढाका जादैछ । तर, सहभागी टिम संख्या बढेको कारण नेपाललाई उपाधि रक्षा गर्न त्यति सहज छैन ।

नेपाली टोलीका कप्तान अरुणा शाही भने च्याम्पियन बनेरै फर्कने बताउछिन् ।

'यसलाई हामीले अवसरको रुपमा हेरेका छौँ । पछिल्लो पटक हामी च्याम्पियन भएर आएका थियौं,' कप्तान अरुणा भन्छिन्, 'अहिले पनि हाम्रो लक्ष्य च्याम्पियन हुनुपर्छ भन्नेछ । त्यहिँ अनुसार तयारी गरिरहेका छौँ । हाम्रो लक्ष्य नै च्याम्पियन बन्ने हो ।'

प्रतियोगितामा महिलातर्फ ६ टिमको सहभागिता रहेको छ । महिलामा आयोजक  बंगलादेश, नेपाल, किर्गिस्तान, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

'पाँच टिमसँग हामीले खेलिसकेका छौँ । उज्वेकिस्तान हाम्रो लागि नयाँ टिम हो ।  श्रीलंका पनि बलियो टिम छ । राम्रै तयारी गरेका छौँ जित्छौं होला,' नयाँ टिमबारे अरुणाले भनिन् ।

प्रतियोगिताका लागि नेपाली टोलीले राम्रो तयारी गर्न भने पाएन । तर, कम तयारीमा राम्रो नतिजाका लागि टिम केन्द्रित भएको अरुणा बताउछिन् ।

'प्रशिक्षण थालेको एक महिना हुनै लाग्यो । सुरुआतमा भन्दा धेरै सुधार भईरहेको छ । नयाँ बहिनी(खेलाडी) हरुको आगमन भएको छ । टिम राम्रो बनेको छ । तयारी राम्रो भईरहेको छ,' अरुणाले भनिन्, 'कोरोनाले गर्दा मैत्रीपूर्ण खेलहरु खेल्न नपाउने अवस्था छ । त्यसैले जे छ त्यसैमा एडजस्ट भएर कसरि राम्रो नतिजा ल्याउन सकिन्छ  भनेर केन्द्रित छौँ ।'

कप्तान अरुणाले टिमको कमजोर पक्ष सर्भिस र रिसिभमा सुधार भईरहेको बताईन् ।

'सर्भिस र रिसिभ बलियो बनाउनु पर्छ । सर्भिस राम्रो गरेर विपक्षीको स्पाइकर चल्न नदिए जित्न सजिलो हुन्छ । हाम्रो स्पाइकर त्यसै बलियो छ । त्यसमा पनि सर्भिस, रिसिभ र ब्लक राम्रो भएको छ,' अरुणाले भनिन् ।  

मुख्य प्रशिक्षक जगदीश भट्टले घोषणा गरेको टोलीमा तीन खेलाडी पहिलो पटक परेका छन् । लक्ष्मी चन्द,  कामना विष्ट र शान्ती थारुले पहिलो पटक राष्ट्रिय टोलीमा स्थान बनाएकी छिन् ।

नेपाली महिला टिम  :

अरुणा शाही, प्रतिभा माली, सरस्वती चौधरी, शान्ति थारु, उषा भण्डारी,  सफिया पुन, सुनिता खड्का,  मनिषा चौधरी, कृपा अधिकारी, कामना विष्ट, लक्ष्मी चन्द, सलिना श्रेष्ठ