बेलिङ्घममाथि अनुसन्धान

काठमाडौं । जर्मन फुटबल एसोसियसनले बोरुसिया डर्टमण्डका मिडफिल्डर जुड बेलिङ्घममाथि अनुसन्धान सुरु गरेको छ ।

बेलिङ्घमले रेफ्री फेलिक्स ज्वाएरको बारेमा गरेको टिप्पणीमाथि जर्मन एफएले छानबिन सुरु गरेको हो।

इंग्ल्यान्डका मिडफिल्डरले बुन्डेसलिगा अन्तर्गत बायर्न म्युनिखविरुद्धको खेलपछि रेफ्री फेलिक्सको नियुक्तिबारे टिप्पणी गरेका थिए ।

उक्त खेलमा बायर्नले डर्टमण्डलाई ३-२ गोल अन्तरले हराएको थियो ।

खेलको ७७ औं मिनेटमा रोबर्ट लेवान्डोस्कीले विवादित पेनाल्टीमा गोल गर्दै बायर्नलाई ३-२ को जित दिलाएका थिए ।

माट हुमेल्सले पेनाल्टी एरियामा ह्यान्डबल गरेपछि रेफ्री फेलिक्सले बायर्नलाई पेनाल्टी दिएको थियो  ।

डर्टमण्डका खेलाडीले उक्त पेनाल्टीविरुद्ध अपिल गरेका थिए । तर, रेफ्री फेलिक्सले अस्विकार गरेका थिए ।

'तपाईले रेफ्री दिनुहुन्छ । जतिबेला पहिले नै खेल फिक्स भईसकेको छ ।  तपाइँ के आशा गर्नुहुन्छ,' बेलिङ्घमले खेलपछि भनेका थिए ।