काठमाडौं । सहिद स्मारक 'ए' डिभिजन लिग फुटबलमा मनाङ मर्स्याङ्दी क्लबले संकटा क्लबसँग रोमान्चक बराबरी खेलको छ ।
त्रिपुरेश्वरस्थित दशरथ रंगशालामा शनिबार भएको खेलमा मनाङले संकटासँग २-२ गोलको बराबरी खेलेको हो ।
संकटाका लागि निरज बस्नेत र उत्तम राईले एक एक गोल गरे ।
कीर्तिमानी आठ पटकको च्याम्पियन मनाङका लागि दयानन्द सिंह र फ्रान्कलिन क्वेटाले एक एक गोल गरे ।
प्रतिस्पर्धात्मक बनेको खेलको २९ औं मिनेटमा मनाङले गोलको अवसर गुमायो । संकटाका गोलकिपर राजाबाबु गुरुङ बिट भईसकेको अवस्थामा मनाङका कप्तान अन्जन विष्टले प्रहार गरेको बल निरज बस्नेतले गोललाइनबाट बचाए ।
लगत्तै ३१ औं मिनेटमा निरजले गोल गर्दै संकटालाई सुरुआती अग्रता दिलाए । लक्ष्मण रुचालको फ्रिकिक पासमा निरजले हेडरमार्फत गोल गरे ।
तर, खेलको ३५ औं मिनेटमा दयानन्दले गोल गर्दै मनाङलाई १-१ गोलको बराबरीमा फर्काए । पुजन उपरकोटीको फ्रिकिकमा फ्रान्कलिन क्वेटाको पासमा भारतीय मिडफिल्डर दयानन्दले हेडरमार्फत गोल गरे ।
दोस्रो हाफमा दुबै टोलीले आक्रामक खेल पस्किएको थियो ।
खेलको ७० औं मिनेटमा उत्तमले गोल गर्दै संकटालाई २-१ को अग्रता दिलाए । दोस्रो हाफमा मैदान प्रवेश गरेका उत्तमले फोडे फोफानाको पासमा सिक्स यार्ड बक्सबाट गोल गरे । उतम ६५ औं मिनेटमा सुवास गुरुङको स्थानमा मैदान प्रवेश गरेका थिए ।
७४ औं मिनेटमा सरोज योन्जन लामाले पेनाल्टी एरियाको ठिक बाहिरबाट प्रहार गरेको बल संकटाका गोलकिपर राजाबाबुले बचाएपछि मनाङ बराबरी गर्न चुकेको थियो ।
तर, खेलको इन्जुरी समयमा फ्रान्कलिनले गोल गर्दै मनाङलाई २-२ गोलको बराबरीमा ल्याएर हारबाट जोगाए ।
संकटाका निरज बस्नेतले हेडमार्फत क्लियर गरेको बलमा पेनाल्टी एरियाको ठिक बाहिर रहेका फ्रान्कलिनको भली प्रहारले पोस्टको जाली चुमेको थियो ।
यस बराबरीसँगै मनाङले ३ खेलमा ७ अंक जोडेको छ । मनाङ दोस्रो स्थानमा यथावत रहेको छ ।
मनाङले पहिलो खेलमा जावलाखेल युथ क्लबलाई १-० ले हराएको थियो । यस्तै दोस्रो खेलमा हिमालयन शेर्पालाई १-० ले नै हराएको थियो ।
संकटा भने ५ अंक जोडेर तेस्रो स्थानमा उक्लिएको छ । संकटाले पहिलो खेलमा हिमालयन शेर्पासँग १-१ गोलको बराबरी खेलेको थियो । दोस्रो खेलमा संकटाले फ्रेन्ड्स क्लबलाई २-१ गोल अन्तरले पराजित गरेको थियो ।
खेलमा संकटका टाम्पी अर्नेस्ट म्यान अफ दि म्याच चुनिए । संकटाकै जय गुरुङ इमर्जिङ प्लेयर बने ।
