काठमाडौं । नेपाली राष्ट्रिय यू-२३ फुटबल टिमका मुख्य प्रशिक्षक बाल गोपाल महर्जनले एएफसी यू-२३ एसियन कप छनोटमा ताजिकिस्तान र लेबनानलाई दबाबमा राख्न सकिने बताएका छन् ।
मुख्य प्रशिक्षक महर्जनले ताजिकिस्तान र लेबनान बलियो भएपनि बल पोसेसनमा पकड जमाउन सकेमा दुबै टोलीलाई दबाबमा राख्न सकिने बताएका हुन् ।
'ताजिकिस्तान र लेबनानको खेल हेर्दा ताजिकिस्तान पनि राम्रो छ । राम्रा खेलाडीहरु छन्, बलियो टोली हो, टेक्निकल्ली र ट्याक्टिकल्ली राम्रो छ,' प्रशिक्षक महर्जनले भने, 'तर, इरान झै हामीले बल आफ्नो कन्ट्रोलमा राख्न सक्यौ भने ताजिकिस्तान र लेबनानलाई दबाबमा राख्न सक्छौं ।'
छनोटमा नेपालले ताजिकिस्तानसँग बिहीबार प्रतिस्पर्धा गर्नेछ । त्यस्तै अन्तिम खेलमा नेपालले लेबनानसँग आगामी आइतबार खेल्नेछ ।
छनोटको पहिलो खेलमा भने नेपाल इरानसँग ४-० ले पराजित भएको थियो । पहिलो हाफमा बराबरी खेलेको नेपालले दोस्रो हाफमा ४ गोल खाएको थियो ।
प्रशिक्षक महर्जनले कमजोर तयारीको कारण पहिलो खेलमा हार व्यहोरेको समेत बताए ।
'सोमबारको खेल हाम्रो पहिलो खेल हो । त्यसैपनि इरान विश्वकै एक सशक्त टिम हो । एसियाको स्तरमा मात्र नभएर तर त्यो टिमलाई पनि हामीले पहिलो हाफमा गोलरहित बराबरी गर्न सफल भयुन,' उनले भने, 'योजना अनुसार राम्रो भयो तर यो प्रतियोगिताको लागि हाम्रो जुन तयारी थियो त्यसका लागि पर्याप्त समय र मैत्रीपूर्ण खेलहरु भएको भए अझ यो भन्दा पनि राम्रो प्रदर्शन हुन्थ्यो, नतिजा राम्रो हुन्थ्यो जस्तो लाग्छ मलाई ।'
महर्जनले दोस्रो हाफको सुरुआतमै गोल खाएपछि टिम दबाबमा आएको समेत बताए ।
'दोस्रो हाफको सुरुवातमै जुन गोल खान पुग्यौ त्यो हामीले होल्ड गर्न सकेनौ । हाम्रो राम्रो नतिजा हुन्थ्यो जस्तो लाग्छ किनकी हामीले दोस्रो हाफको सुरुवातमै गोल खान पुग्यो । दुई मिनेटमै दुई गोल खानपुग्दा, फिटनेश तथा एकाग्रताको कमी साथै उनीहरुले डिफेन्समा धेरै दबाब दियो जुन हाम्रा डिफेन्डरले थेग्न सकेन,' उनले थपे ।
प्रशिक्षक महर्जनले टिममा बल आफ्नो पक्षमा राखेर अट्याक्ट गर्ने क्षमता रहेको र बल आफ्नो पक्षमा राख्न सक्नु नै नेपालको लागि राम्रो कुरा भएको बताए ।
छनोटको यस समूहको शीर्ष टोलीले एएफसी यू-२३ एसियन कप खेल्नेछन् । यस्तै दोस्रो टोली मध्ये उत्कृष्ट चार टोली पनि यू-२३ एसियन कपमा छनोट हुनेछन् ।
उज्वेकिस्तानमा हुने फाइनल चरणको प्रतियोगिता २०२२ को जुन १ देखि १९ सम्म हुने तालिका रहेको छ।
