काठमाडौं । इंग्ल्यान्डका पूर्व डिफेन्डर मिका रिचार्डसले म्यान्चेस्टर युनाइटेडले मुख्य प्रशिक्षक ओल गन सोल्सारलाई राख्ने वा हटाउने बारेमा निर्णय लिनु आवश्यक रहेको बताएका छन् ।
इंग्लिस प्रिमियर लिग फुटबल अन्तर्गत ओल्ड ट्राफोर्डमा आईतबार लिभरपुलसँग ५–० ले पराजित भएपछि रिचार्डसको सो भनाई आएको हो ।
उनले युनाइटेड आधारभूत कुरामा फर्किनुपर्ने तथा मुख्य प्रशिक्षक सोल्सारबारे निर्णय लिनुपर्ने कुरामा जोड दिए ।
रिचार्डसले युनाइटेड समूहको नभएर व्यक्तिहरुको टिम भएको समेत बताए ।
उनले टिमका सबैजना आधारभूत कुराहरु जस्तै दौड्नु र ट्याक्ल गर्नुको साटो स्टार बन्न खोजेको आरोप समेत लगाए ।
सोल्सार सन् २०१८ देखि युनाइटेडको मुख्य प्रशिक्षकको रुपमा रहेपनि उनले हालसम्म कुनै उपाधि जिताउन सकेका छैनन ।
गत सिजनको प्रिमियर लिगमा युनाइटेड दोस्रो स्थानमा सिमित भएपछि फ्रान्सका लागि विश्वकप जितेका डिफेन्डर राफायल भाराने, इंग्ल्यान्डका फरवार्ड जाडोन सान्चो तथा पोर्चूगलका फरवार्ड क्रिस्टीयानो रोनाल्डोलाई क्लबमा भित्र्याएका थिए ।
तर रोनाल्डोलाई क्लबमा भित्र्याएपछि क्लबको खेल्ने शैली के हुनेबारेमा सोल्सारले निर्णय गर्न नसकेको तथा खेलाडीहरुबीच तालमेल मिलाउन नसकेको आरोप समेत रिचार्डसले लगाए ।
