काठमाडौं । साबिकको विजेता नेपालले बंगलादेशमा पाँचौ संस्करणको बंगबन्धु अन्तर्राष्ट्रिय गोल्डकपमा उत्कृष्ट प्रदर्शन गर्न सकेन । नेपाल प्रतियोगिताको समूह चरणबाटै बाहिरियो ।
पहिलो खेलमा ताजकिस्तान र दोस्रो खेलमा प्यालेस्टाइनसंग पराजित भएपछि समूह 'ए' को नेपाल अंक बिहिन बन्दै घर फर्कियो । नेपाली राष्ट्रिय टोली आइतबार नै स्वदेश आइपुगेको छ ।
साबिकको विजेताको हैसियतले बंगलादेश गएको नेपाली टोली दोस्रो चरणमै नपुगी फर्किएपछि आलोचित बन्न पुगेको छ । नेपाली टोलीले किन उच्च प्रदर्शन गर्न सकेन ? लगायतका प्रश्नहरु आउने थालेको थियो ।
तर, नेपाली टोलीका कप्तान बिराज महर्जनले राजधानीमा सुरु भएको 'ए' डिभिजन लिगको दबाबले राम्रो गर्न नसकेको बताएका छन् । उनले नेपाली टोलीका अधिकांस सदस्यको चासो लिगमा रहेको कारण टोलीको प्रदर्शन खस्किएको बताए ।
'हामीले राम्रै प्रदर्शन गरेका थियौ । तर, हाम्रा खेलाडीलाई लिगको दबाब भयो । खेलाडीले लिगमा कसरि राम्रो गर्ने भन्ने मानसिकता भयो । त्यसैले हाम्रो खेलमा केहि कमजोरी देखियो,' स्वदेश फर्किएपछि त्रिभुवन अन्तर्राष्ट्रिय विमानस्थलमा कप्तान महर्जनले भने ।
बंगबन्धुको लागि नेपाली टोलीले केहि दिनको तयारीपछि बंगलादेश गएको थियो । त्यसअघि खेलाडीहरु 'ए' डिभिजन लिगका लागि क्लबमा व्यस्त रहेका थिए । अब पुन: खेलाडी क्लबमा व्यस्त हुनेछन् ।
यस्तै कप्तान बिराजले तीन खेलाडी घाइते हुँदा टोलीमा समस्या आएको समेत बताए । कप्तान महर्जनले भने, 'हाम्रा तीन जना खेलाडी घाईते भए । त्यहिँ कारण खेलमा दबाव भएको थियो ।'
प्यालेस्टाइनविरुद्ध कप्तान बिराज र अनन्त तामाङ मैदान उत्रेनन । घाइते बाबजुत आदित्य चौधरी भने मैदान उत्रिएका थिए । जुन खेल नेपालले प्यालेस्टाइनसंग १ - ० ले हारेको थियो । त्यसअघि समूह चरणको पहिलो खेलमा नेपाल ताजकिस्तानसंग २ - ० ले स्तब्ध भएको थियो ।
तर, कप्तान बिराजले नेपालले दुवै टोलीविरुद्ध उत्कृष्ट खेलेको दाबी गरे । कप्तान बिराजले भने, 'हामीले ताजकिस्तान भन्दा प्यालेस्टाइनसंग केहि राम्रो खेल पस्केका हौ । त्यसको आधार गोल किपर विकेश कुथु म्यान अफ दि म्याच हुनु हो । हामीले दुबै खेलमा उत्कृष्ट प्रदर्शन गर्यौ । तर, गोल स्कोर गर्न नसकेर हामीले हार बेर्हाेर्नु परेको हो ।'
नेपाली टोलिका प्रशिक्षक बाल गोपाल महर्जनले भने नेपालको हारको मुख्य कारण कठिन प्रतिद्वन्द्वी भएको बताए ।
'हामिले हाम्रो टोली भन्दा बालियो टोलिसंग प्रतिस्पर्धा गर्नु परेको थियो । जुन टोली फिफा वरीयतामा हामीभन्दा माथिल्लो स्थानमा छन्,' प्रशिक्षक बाल गोपालले भने, 'तर, हामीले समग्रमा राम्रो प्रदर्शन गरेका हौं ।'
