नजर हुने छ अञ्जनमा

काठमाडौं । प्रशिक्षक अब्दुल्लाह अल्मुताइरीले भारतविरुद्धको पहिलो अन्तर्राष्ट्रिय मैत्रीपूर्ण खेलमा जुन टिम उतारेको थियो, त्यसमा सबैभन्दा अनुभवी त गोलरक्षक तथा कप्तान किरण चेम्जोङ नै रहे ।

त्यसपछि ‘क्याप’ को आधारमा सबैभन्दा बढी अनुभवी खेलाडी थिए, अञ्जन विष्ट । उनले त्यस खेलमा एक गोल पनि गरे ।

दोस्रो खेलमा पनि सबैको नजर यिनै अञ्जनमा हुनेछ, किनभने उनी एक प्रकारले गोल लयमा छन् । सन् २०१४ मा उनले नेपालका लागि डेब्यु गरे, तर पहिलो गोलका लागि उनले पाँच वर्ष कुर्नु परेको थियो ।

उनले सन् २०१९ मा विश्वकप छनोटमाचाईनिज ताइपेविरुद्ध दुई गोल गरेका थिए, यसको पहिलो गोल अञ्जनको आफ्नै पहिलो गोल पनि थियो ।

भारतविरुद्धको उनको पछिल्लो गोल भने व्यक्तिगत पाँचौं रह्यो । यसरी पछिल्ला १४ खेलमा उनले पाँच गोल गरिसके, त्यो पनि दुई वर्षको अन्तरमा ।

यो एक प्रकारले गोल लयमै रहेको प्रमाण त हो नि । उनले इराक र फेरि ताइपेविरुद्ध नै गोल गरेका छन् । त्यसैले अपेक्षा गर्न सकिन्छ, उनले फेरि भारतविरुद्धको दोस्रो खेलमा पनि गोल गर्नेछन् ।

अनि चाँडै हुने साफ च्याम्पिनसिपमा पनि । सम्भवत: अञ्जन अहिले आफ्नो खेल जीवनको सबैभन्दा उत्कृष्ट लयमा छन् । उनका लागि पहिलो नेपाल सुपर लिग पनि राम्रै रह्यो । उनले ललितपुर एफसीका लागि कप्तानी मात्र गरेनन्, सात खेलमा तीन गोल पनि गरे ।

त्यसैले भारतविरुद्धको आजको खेलमा सबैभन्दा पछ्याउन लायक खेलाडी रहनेछन्, अञ्जन ।