अमेरिकाको फराकिलो जित, ब्राजिल रोकियो  

एजेन्सी । टोकियो ओलम्पिक अन्तर्गत महिला फुटबलमा अमेरिकाले फराकिलो जित निकालेको छ ।

शनिबार भएको खेलमा अमेरिकाले न्युजिल्याण्डलाई ६-१ गोल अन्तरले पराजित गरेको हो ।

अमेरिकाको जितमा रोज लाभेल्ली, लिन्डसे होरन, क्रिस्टिन प्रेस र एलेक्स मोर्गनले एक एक गोल गरिन् ।

अमेरिकाले दुई गोल आत्मघाती उपहार पाएको थियो ।  न्युजिल्याण्डका अब्बे एर्चेग र क्याथरिन बोटले आत्मघाती गोल गर्दा बेट्से हासेटले एक गोल फर्काइन ।

समूह 'जी' मा रहेको अमेरिकाको यो पहिलो जित हो । पहिलो खेलमा अमेरिका स्विडेनसँग पराजित भएको थियो ।

अमेरिकाले समूहको २ खेलमा ३ अंक जोडेको छ । स्विडेनले २ खेलमा ६ अंक जोडेको छ । न्युजिल्याण्डले दुबै खेक गुमाएको छ ।

शनिबार नै भएको खेलमा स्विडेनले अष्ट्रेलियालाई ४-२ ले हराएको थियो ।

महिला फुटबल अन्तर्गत नै ब्राजिलले नेदरल्यान्ड्ससँग ३-३ गोलको बराबरी खेल्दै अंक बाडेको छ ।

यस्तै ग्रेट ब्रिटेनले जापानलाई १-० ले पराजित गरेको छ ।

त्यस्तै चीन र जाम्बियाले ४-४ गोलको बराबरी खेल्दै अंक बाडेका छन् ।

अर्को खेलमा क्यानडाले चिलीलाई २-१ ले हराएको छ ।