काठमाडौं । अखिल नेपाल फुटबल संघ (एन्फा)का केन्द्रिय सदस्य रुपेश अधिकारीले फ्रेन्चाईज फुटबल क्लब चितवन एफसीबाट प्राप्त पारिश्रमिक खेलाडीलाई हस्तान्तरण गरेका छन् ।
फ्रेन्चाईज फुटबल नेपाल सुपर लिग (एनएसएल)मा चितवन एफसीको म्यानेजर बनेका अधिकारीले क्लबबाट प्राप्त पारिश्रमिक चोटका कारण मैदान बाहिर रहेका तीन महिला फुटबलरलाई हस्तान्तरण गरेका हुन् ।
उनले क्लबबाट प्राप्त हुने सम्पुर्ण पारिश्रमिक राष्ट्रिय महिला टिमकी फरवार्ड सावित्रा भण्डारी, हिरा भुजेल र समिक्षा घिमिरेलाई दिने घोषणा गरेका थिए ।
प्रतिबद्धता अनुसार अधिकारीले प्राप्त रकम काठमाडौंमा रहेका खेलाडीलाई शुक्रबार हस्तान्तरण गरे । अधिकारी भने अहिले उपत्यका बाहिर रहेका छन् । उनले आफ्ना प्रतिनिधिमार्फत खेलाडीलाई रकम उपलब्ध गराएका हुन् ।
तीन जना महिला फुटबलरमा हिरा भुजेलको चोटको सफल सल्यक्रिया भएको छ भने सावित्रा उपचारका लागि शनिबार कतार प्रस्थान गर्दैछिन् ।
एन्फाले सावित्राको उपचारका लागि कतार फुटबल संघसंग समन्व्य गरि व्यवस्था मिलाएको हो । सोही अनुसार सावित्राको चोटको उपचार कतारको सुविधा सम्पन्न अस्पतालमा हुन लागेको हो ।
सावित्रा कतार उड्नु अघि अधिकारीले तीन जना महिला फुटबलरलाई आफुले क्लबबाट प्राप्त गरेको रकम हस्तान्तरण गरेका हुन् ।
‘लकडाउनका कारण ढिला गरि हस्तान्तर भयो । सावित्रा शनिबारनै कतार जाने कार्यक्रम छ । सोही कारण अघिल्लो दिननै खेलाडीलाई रकम हस्तान्तरण गरेको हुँ ।’ अधिकारीले भने ।
उनले चोटले थलिएका खेलाडीलाई हौसला प्रदान गर्न र फुटबलसंग सम्बन्धित सबैलाई सहयोग गर्न प्रेरणा मिलोस भनेर खेलाडीलाई रकम हस्तान्तरण गरेको बताए ।
‘हाम्रो पहलकदमीले खेलाडीलाई थोरै भएपनि सहयोग हुन्छ ।’ उनले भने, ‘उपचारको समस्याबाट कुनैपनि खेलाडी खेल जिवनबाट टाढा नहोस भन्ने मान्यता राख्छु ।’
एन्फा केन्द्रिय सदस्य अधिकारी स्वास्थ्य क्षेत्रमा पनि आबद्ध छन् । उनी फिजियोथेरापी सहितको सेवाका लागि प्रसिद्ध स्पार्क हस्पिटल सञ्चालन गर्छन् ।
उनले खेलाडीलाई आवश्यक परेको खण्डमा फिजियोथेरापी सेवा समेत निशुल्क उपलब्ध गराउने गरेको बताए ।
‘विभिन्न तरिकाले फुटबलमा सहयोग गर्न पाउँदा खुसी लाग्छ । फिजियोथेरापी आवश्यक परेर खेल जिवननै सकिने अवस्थाका खेलाडीलाई आफ्नै अस्पतालमा उपचार सेवा दिएर पुन खेलमा फर्कने वातावरण बनाएको छु ।’ उनले भने ।
अधिकारी विराटनगरस्थित विराट सांग्रिला स्पोर्टिङ क्लबका अध्यक्ष हुन् ।
