नेपालको फितलो ब्याटिङ, इटालीलाई सामान्य लक्ष्य

काठमाडौं। नेपालले आईसीसी टी–२० विश्वकपअन्तर्गत आफ्नो दोस्रो खेलमा इटालीलाई १२४ रनको सामान्य लक्ष्य दिएको छ।

वानखेडे रंगशालामा टस हारेर ब्याटिङमा उत्रिएको नेपाल २० ओभरको खेलमा १९.२ ओभरमा ९ विकेट गुमाउँदै १२३ रनमा सीमित भयो।

नेपालका आरिफ शेखले सर्वाधिक २७ रन (२४ बल, ३ चौका) बनाए। कप्तान रोहित पौडेलले १४ बलमा २३ रन (२ छक्का) जोड्दा आसिफ शेखले २० र दीपेन्द्र सिंह ऐरीले १७ रन बनाए। अन्त्यतिर करण केसीले अविजित १८ रन जोडेर स्कोर उकास्ने प्रयास गरे।

ओपनर कुशल भुर्तेल ५ रनमा आउट भए भने लोकेश बम ३, गुलशन झा ३ र नन्दन यादव शून्यमा आउट भए। सन्दीप लामिछानेले ५ रन जोडे। नेपाल पछिल्ला ५ ओभरमा ५ विकेट गुमाउँदै मात्र २७ रन जोड्न सफल भयो।

इटालीका क्रिशान कलुगामागे सर्वाधिक सफल बलर बने। उनले ४ ओभरमा १८ रन खर्चेर ३ विकेट लिए। बेन मानेन्तीले ४ ओभरमा मात्र ९ रन दिँदै २ विकेट लिएर किफायती प्रदर्शन गरे। अली हसन, जेजे स्मट्स र जसप्रीत सिंहले समान १/१ विकेट लिए।