डेनमार्कलाई फिनल्याण्डको चुनौती

एजेन्सी । १६ औं संस्करणको युरोकप फुटबल अन्तर्गत आज (शनिबार) हुने दोस्रो खेलमा डेनमार्क र फिनल्याण्डले प्रतिस्पर्धा गर्दैछन् ।

कोपनहेगनमा घरेलु टिम डेनमार्कले फिनल्याण्डसँग खेल्नेछ । दुई टिमबीचको खेल राति ९:४५ बजे सुरु हुनेछ ।

घरेलु मैदानमा डेनमार्क जित निकाल्दै सुखद सुरुवात गर्न चाहन्छ ।  फिनल्याण्ड पनि डेनमार्कलाई हराएर सुखद सुरुवात गर्न चाहन्छ  । त्यसैले दुई चिरपरिचित प्रतिद्वन्दीबीचको खेल रोमान्चक हुने अनुमान गरिएको छ ।

तुलनात्मक रुपमा डेनमार्क टिम बलियो देखिएको छ । हेड टु हेडमा समेत डेनमार्कको टिम बलियो देखिएको छ ।

डेनमार्क र फिनल्याण्डले हालसम्म ५९ खेल खेलेका छन् । जसमा डेनमार्कले ३८ खेल जितेको छ ।

फिनल्याण्डले ११ खेल जित्दा दुई टिमबीचको १० खेल बराबरीमा सकिएको छ ।

युरोको आफ्नो पहिलो खेलमा डेनमार्कलाई चोटले सताउने छैन । डेनमार्कको टिम पूर्ण फिट रहेका छन् ।

डेनमार्कलाई क्रिस्टियन एरिक्सन, मार्टिन ब्रेथवेट र युसुफ पाउलसेन जस्ता खेलाडीको साथ रहने छ ।

फिनल्याण्डलाई समेत खेलाडीको चोटले सताउने छैन । फिनल्याण्डका मुख्य हतियार टिमु पुकी चोटमुक्त हुँदै टिममा फर्किसकेका छन् ।

यो पढ्नुहोस ।

युरोपको च्याम्पियन ‘डेनिस डायनामाइट’