काठमाडौं । राष्ट्रिय फुटबल टिमका नयाँ प्रशिक्षक हुन्, अब्दुल्लाह अलमुताईरी । कुवेती प्रशिक्षक अलमुताईरी स्विडिस प्रशिक्षक योहान कालिनलाई प्रतिस्थापन गर्दै नेपाली टिम सम्हाल्न आईपुगेका हुन् ।
कोरोनाका कारण कालिन स्विडेन फर्किएका थिए । पछि उनी नेपाल फर्किन मानेनन् । फिफाका प्रतियोगिता खेलाउन प्रो–लाईसेन्स प्रशिक्षक आवश्यक हुन्छ । अनि एन्फाले अलमुताईरीलाई मुख्य प्रशिक्षकको रुपमा घोषणा गर्यो ।
दक्षिण एसियाली फुटबलको सबै भन्दा ठुलो प्रतियोगिता हो, साफ फुटबल । साफ जित्नु नेपालका लागि सपना जस्तै हो । राष्ट्रिय टिमका मुख्य प्रशिक्षकलाई एन्फाले साफ फुटबलको उपाधिनै ‘टार्गेट’ दिने गर्छ । कालिनलाई पाएको जिम्मेवारी पनि त्यही थियो । त्यो अब अलमुताईरीमा सरेको छ ।
साफ आउन केही महिना बाँकी छ । तर तत्काल नेपालका अघि विश्वकप छनोटका करिब आधा खेल खेल्न बाँकी छ । कोरोना नभएको भए काठमाडौंको दशरथ रंगशालामा नेपालले जोर्डन, अष्ट्रेलिया र चाईनिज ताईपेसंग खेल्ने थियो । कोरोनाका कारण नेपालले खेल्ने बाँकी खेल कुवेतमा हुँदैछ ।
नेपालले खेल्ने माथिल्लो स्तरको फुटबल भनेकै विश्वकप छनोट हो । नेपालले अहिले दोस्रो चरणमा प्रतिस्पर्धा गर्दैछ । एसियाली छनोट अन्तर्गत नेपालले अष्ट्रेलिया, ताईपे, जोर्डन जस्ता बलिया टिमसंग खेल्न बाँकी छ । पहिलो चरणको अवे म्याच नेपालले खेलिसकेको छ । कोरोनाका कारण आफ्नो होम म्याच कुवेतमा खेल्न लागेको हो ।
विश्वकप छनोटमा सक्दो राम्रो प्रर्दशन गर्नु नेपालको लक्ष्य हो । अवे म्याचले छनोटको तेस्रो चरण पुग्ने नेपालको सम्भावना कठिन देखाउँछ । तर नेपालले समूह बी बाट तेस्रो चरण जाने टिमको समिकरण भने प्रभावित पार्न सक्छ । समूह बी मा नेपालको महत्व सोही कारण छ । अझ चाईनिज ताईपेलाई उछिन्दै एसिया कप छनोटमा सहभागी हुने अवसर नेपाललाई छ । सोही कारण नेपालका लागि कुवेत भ्रमण महत्वपूर्ण छ ।
अलमुताईरीले नेपाली टिम सम्हालेको धेरै भएको छैन । तर उनले ठुलो जोखिम लिएर नयाँ खेलाडीलाई राष्ट्रिय टिममा राखेका छन् । जसमा धेरै युवा खेलाडी छन् । नयाँ ६ खेलाडीलाई उनले राष्ट्रिय टिममा स्थान दिए । खेलाडी छनोटलाई लिएर उनले धेरै प्रश्न आए । अलमुतारीले सबै प्रश्नको डटेर सामना गरे । एक प्रशिक्षकलाई आफु अनुकुलको टिम बनाउने अधिकार हुन्छ । अलमुताईरीले साफलाई लक्षित गर्दै युवा टिम बनाएका छन् । चोट बोकेका र लय गुमाएका खेलाडीलाई बाहिरै राखे । बरु नयाँ खेलाडीबाट जोखिम लिन अग्रसर देखिए ।
अलमुताईरी प्रभाव
पहिलो,
अलमुताईरीले राष्ट्रिय टिममा एउटा नारा दिएका छन्, ‘एक टिम, जय नेपाल’ । उनले दिएको नाराले भन्छ, उनी एकिकृत टिम चाहन्छन् । टिमभित्र कुनै विभाजन चाहदैनन् । टिम एकिकृत भए बाँकी लडाँई जित्न सहज हुने उनको विश्वास छ । सोही अनुसार खेलाडीलाई उत्साहीत बनाएका छन् । मनोबैज्ञानिक रुपमा खेलाडीलाई जोडेर राखेका छन् ।
दोस्रो,
उनी टिमको मनोविज्ञान बदल्न चाहन्छन् । बलिया टिमविरुद्ध सधै रक्षात्मक खेल्ने नेपाली टिमको शैली उनी परिवर्तन गर्न चाहन्छन् । उनी आक्रमण फुटबल खेल्न चाहन्छन् । उनी तत्काल नतिजा भन्दा प्रर्दशनलाई ध्यान दिएका छन् । सोही अनुसार खेलाडीलाई तयार पारेका छन् । उनले सार्वजनीक रुपमै बोलेका छन्, अब नेपालले बलिया टिमबिरुद्ध आक्रमक फुटबल खेल्छ ।
‘कसैले ‘क्रेजी’नै किन नभनोस, नेपालले अब गोलको अधिकतम प्रयास गर्छ ।’ उनी यसै भन्छन् । आक्रमक फुटबलका लागि उनले अहिले खेलाडीलाई मनोबैज्ञानिक रुपमै तयार पार्ने काम गरिरहेका छन् ।
तेस्रो,
लक्ष्य साफ च्याम्पियनसिप भएपनि तत्काल नेपालले विश्वकप छनोटको खेल खेल्दैछ । कुवेतमा उत्रनु अघि नेपालले ईराकसंग मैत्रीपूर्ण फुटबल खेल्दैछ । नेपाल प्राय बलिया टिमसंग मैत्रीपूर्ण खेल खेल्न चाहदैन । बलिया टिमसंग खेलेर किन जोखिम लिने भन्ने मनोविज्ञान नेपाली फुटबलमा छ । तर, अलमुताईरीले पहिलो खेलमै ईराकलाई रोजे । उनी ईराकसंग नतिजा भन्दा प्रर्दशनमा केन्द्रित छन् । ईराकमार्फत खेलाडीमा आत्मविश्वास भर्न चाहन्छन् । एक हिसाबले आफुलाई परिक्षण गर्न चाहन्छन् । ठुला टिमसंग खेलेर मात्र साफ फुटबल र एसिया कप छनोटमा आफुलाई तयार गर्न सकिने उनले बुझेका छन् ।
चौथो,
कुवेत भ्रमणबाट नेपाली फुटबलले दुई नतिजा चाहेको छ । चाईनिज ताईपेसंग प्रष्ट जित र जोर्डनसंग कम्तिमा बराबरी । दबाब अलमुतारीमाथि पनि छ । सोही कारण उनले खेलाडीलाई ईराक र ताईपेसंगको खेलमा बढीनै केन्द्रित गरेका छन् । ईराकसंगको खेलबाट उनी टिमको कमजोरी जाँच्न चाहन्छन् । ताईपेविरुद्ध गल्ती गर्ने छुट नेपाललाई हुने छैन । ताईपेसंग प्राप्त हुने एक जितले नेपालले एसिया कप छनोटमा स्थान पक्का गर्नेछ । उनले नयाँ खेलाडीमा विश्वास गरेका छन् । युवा टिममा विश्वास गरेका छन् । उनले भविष्यलाई हेरेर युवा टिम बनाएको बताउँछन् । तर तत्काल सोही टिमबाट नतिजा निकाल्ने दबाब उनीमाथि छ ।
-1753109306.jpeg)
