टाइब्रेकरमा आर्मीलाई हराउँदै एपीएफ फाइनलमा

बिर्तामोड। झापा महिला गोल्डकपको उपाधिका लागि विभागीय दुई टोली एपीएफ फुटबल क्लब र नेपाल पुलिस क्लब भिड्ने भएका छन्।

झापाको शिवसताक्षीस्थित दुधे रंगशालामा शनिबार सम्पन्न सेमिफाइनलमा आर्मीलाई टाइब्रेकरमा ४–२ ले पराजित गर्दै एपीएफले विभागीय भिडन्त सुनिश्चित गरेको हो।

पहिलो हाफ गोलरहित बराबरी सकिएको थियो। तर, ६३औं मिनेटमा आर्मीले अग्रता लिन सफल भयो। डिफेन्डर निशा थोकर र गोलकिपर अञ्जना रानाबीचको तालमेल बिग्रिँदा चन्द्रा भण्डारीले सहज गोल गर्दै आर्मीलाई अग्रता दिलाइन्।

इन्ज्युरी समयमा खेलले नाटकीय मोड लियो। आर्मीकी विमला चौधरीले ह्यान्डबल गरेपछि एपीएफले करिब २५ यार्ड दूरीबाट फ्रिकिक पायो। कप्तान अनिता बस्नेतको उत्कृष्ट फ्रिकिक गोल हुँदै खेल १–१ बराबरीमा पुग्यो।

निर्धारित समय बराबरीमा सकिएपछि खेलको निर्णय टाइब्रेकरबाट भयो। टाइब्रेकरमा एपिएफका सविता रानामगर, अनिता बस्नेत, निशा थोकर र रश्मिकुमारी घिसिङले गोल गरे। रेनुका हमालको प्रहार आर्मीकी गोलकिपर कोपिला खड्काले रोकिन्।

आर्मीका विमला बिक र अनिता लम्जेलले मात्र गोल गर्न सके। विमला चौधरी र सुस्मिता चौधरीका प्रहार एपीएफकी अञ्जना रानामगरले बचाइन्।

अञ्जना नै प्लेयर अफ द म्याच घोषित भइन्। उनले १५ हजार रुपैयाँ र ट्रफी प्राप्त गरिन्। प्रतियोगिताको फाइनल खेल कात्तिक २४ गते हुनेछ।