श्रीलंकालाई टेस्ट सिरिज

एजेन्सी । घरेलु टिम श्रीलंकाले बंगलादेशविरुद्धको दुई खेलको टेस्ट सिरिज जितेको छ ।

केन्डीमा सोमबार दोस्रो टेस्टमा बंगलादेशलाई २ सय ९ रनले पराजित गर्दै श्रीलंकाले सिरिज १-० ले आफ्नो बनाएको हो ।

श्रीलंका र बंगलादेशबीचको पहिलो टेस्ट भने ड्र भएको थियो ।

श्रीलंकाले दिएको ४ सय ३७ रनको लक्ष्यसहित दोस्रो इनिङ्स थालेको बंगलादेश २ सय २७ रन जोड्दा अलआउट भएको थियो ।

बंगलादेशका लागि मुस्फुकर रहिमले ४० रन जोड्दा मेहदी हसन मिराजले ३९ रन बनाए ।

बंगलादेशलाई सस्तैमा समेट्न श्रीलंकाका प्रभिन जयविक्रमाले ५ विकेट लिए । रमेश मेन्डिसले ४ विकेट लिए ।

यस अघि दोस्रो इनिङ्समा श्रीलंकाले १ सय ९४ रन जोड्दै इनिङ्स समाप्तिको घोषणा गर्दा बंगलादेशले उच्च लक्ष्य पाएको थियो ।

श्रीलंकाले पहिलो इनिङ्समा ४ सय ९३ रन बनाएको थियो । उसका लाहिरु थिरिमानेले १ सय ४० र कप्तान दिमुथ करुनारत्नेले १ सय १८ रनको शतकीय इनिङ्स खेलेका थिए ।

बंगलादेश पहिलो इनिङ्समा २ सय ५१ रन जोड्दा अलआउट भएको थियो ।