काठमाडौं । पहिलो संस्करणको नेपाल सुपर लिग (एनएसएल) फुटबलमा उपाधि दाबेदार मानिएको धनगढी एफसीले बिहीबार ललितपुर सिटी एफसीसँग बराबरी खेल्दै अंक बाडेको छ ।
त्रिपुरेश्वरस्थित दशरथ रंगशालामा धनगढीले ललितपुरसँग १-१ गोलको बराबरी खेलेको हो ।
ओलावाले आफिजले गोल गर्दै धनगढीलाई सुरुवाती अग्रता दिलाएका थिए । तर, रन्जन विष्टले गोल गर्दै ललितपुरलाई १-१ गोलको बराबरीमा फर्काएका थिए ।
ललितपुरसँग बराबरीमा रोकिएपछि धनगढीका प्रशिक्षक युगल किशोर राई खुसी देखिएनन् । उनले आफ्ना खेलाडीले सोचेजस्तो नखेलेको बताए ।
'आज हाम्रो खेलाडीले सोचे जस्तो खेलेनन् । ललितपुरले राम्रो खेल्यो,' उनले भने, 'डेङी, टेम्पे र एक रातो कार्डले हाम्रो टोलिलाई असर गरेको छ ।'
प्रशिक्षक राईले खेलाडीको चोट पनि टिमका लागि समस्या भएको बताए ।
'खेलाडी रिकभरीको समय थोरै छ । हामीलाई मात्र हैन सबै टिमलाई छ । तर, कसलाई कति पर्यो भन्ने हो । रिकभरी समय थोरै भएको हाम्रो खेलाडीको मसल्स मा समस्गया भईरहेको छ । यसले धेरै असर परेको छ । रिकभरी समय कसरी मिलाउने समस्या छ । खेल तालिका छिटो छिटो भयो ।'
बराबरीसँगै धनगढीले ३ खेलमा ४ अंक जोडेको छ । धनगढी दोस्रो स्थानमा रहेको छ ।
पहिलो खेलमा धनगढी विराटनगर सिटीसँग ३-० ले पराजित भएको थियो । तर, दोस्रो खेलमा धनगढीले काठमाडौं रेजर्सलाई ३-० गोल अन्तरले पराजित गरेको थियो ।
-1747652309.jpeg)
