काठमाडौं । प्रशिक्षक उदय कुमार श्रेष्ठ काठमाडौं ब्याडमिन्टन एकेडेमीको खेलाडी विकास (प्लेयर्स डेभलप्मेन्ट) विभागको प्रमुख नियुक्त भएका छन् ।
एकेडेमीले सोमबार एक विज्ञप्ति जारी गर्दै श्रेष्ठलाई खेलाडी विकास विभागको प्रमुख नियुक्त गरिएको जनाएको छ ।
'अन्तर्राष्ट्रिय जगतमा देशकै नाम उच्च पार्ने खेलाडी उत्पादन गर्ने लक्ष्य प्राप्तिको निम्ति राष्ट्रिय खेलकुद परिषदका मुख्य प्रशिक्षक भइसकेका उदय कुमार श्रेष्ठलाई काठमाडौं ब्याडमिन्टन एकेडेमीको खेलाडी विकास (प्लेयर्स डेभलप्मेन्ट) विभागको प्रमुखमा नियुक्त गरेको जानकारी गराउन चाहन्छौं,' विज्ञप्तिमा भनिएको छ ।
एकेडेमीले उत्कृष्ट खेलाडी उत्पादनको निम्ति ख्याति कमाएका उनको आगमनसँगै एकेडेमीले थप गति लिनेमा विश्वस्त व्यक्त गरेको छ ।
६५ वर्षीय उनले डिप्लोमा इन ब्याडमिन्टन, भारतको नेसनल इन्स्टिच्युट अफ स्पोर्टस् (पटियाला) र विश्व तथा एसियन ब्याडमिन्टनका प्रशिक्षकको कोर्स गरेका छन् ।
एसियन गेम्स १९७४ र एसियन ब्याडमिन्टन च्याम्पियनसिप १९७६ खेलेका उनले सन् १९८० देखि २०१२ सम्म प्रशिक्षकको रुपमा काम गरेका थिए । सुरुका दुई वर्ष नेपाल पुलिस क्लबका खेलाडीलाई प्रशिक्षण दिएका उनी २००२ देखि २०१२ सम्म परिषदका मुख्य प्रशिक्षक थिए ।
मुख्य प्रशिक्षकको रुपमा उनले एसियन गेम्स १९८६ र २०१०, दक्षिण एसियाली खेलकुद (साग) २००४ र २०१० मा नेपाली ब्याडमिन्टन टिम सम्हालेका थिए ।
उनले विश्व प्रसिद्ध ब्याडमिन्टन प्रतियोगिता थोमस कपको छनोट, विश्व च्याम्पियनसिप, एसियन च्याम्पियनसिप, दक्षिण एसियाली च्याम्पियनसिप, एसियन स्याटलाइट ब्याडमिन्टन च्याम्पियनसिपलगायत प्रतिष्ठित २२ वटा अन्तराष्ट्रिय प्रतियोगितामा नेपाली टिमलाई खेलाएका थिए । उनले नेपाली टिमको व्यावस्थापकीय जिम्मेवारी पनि सफलतापूर्वक निर्वाह गरिसकेका छन् ।
-1750292584.webp)
