शीर्ष स्थानमा रहदै नेपाल फाइनलमा

काठमाडौं । नेपाल शीर्ष स्थानमा रहदै घरेलु भूमिमा जारी त्रिकोणात्मक टी–ट्वान्टी क्रिकेट सिरिजको फाइनलमा प्रवेश गरेको छ ।

टियु क्रिकेट मैदानमा बिहीबार भएको अन्तिम लिग खेलमा मलेसियालाई ६९ रनले पराजित गर्दै नेपाल शीर्ष स्थानमा रहदै फाइनल पुगेको हो ।

नेपालले दिएको २ सय १८ रनको लक्ष्यसहित जवाफी ब्याटिङ गरेको मलेसियाले १९ ओभर १ बलमा अलआउट हुँदै १ सय ४८ रन मात्र बनाउन सक्यो ।

खराव सुरुवात गरेको मलेसियाले पहिलो तीन ओभरमा नै दुई विकेट गुमाइसकेको थियो । पहिलो ओभरको चौथो बलमा साद अजिजलाई गुमाएको मलेसियाले तेस्रो ओभरको तेस्रो बलमा अनवर अरुदिनलाई गुमायो ।

अजिजलाई सोमपाल कामीले एलबीडब्लु धरापमा पारेका थिए । अर्का ओपनर अरुदिनलाई सोमपालले नै आफ्नो स्पेलको दोस्रो ओभरमा कटविहाइन्डमा करण केसीको हातबाट क्याच आउट गराएका थिए ।

त्यसपछि मैदानमा आएका कप्तान अहमद फाइज र विरन्दिप सिंहले मलेसियाको इनिङ सम्हाल्ने प्रयास गरेका थिए । तर, कप्तान फाइज आठौं ओभरको दोस्रो बलमा आउट हुन पुगे । उनी सुशन भारीको बलमा लङअनमा कुशल भुर्तेलको हातबाट क्याच आउट भएका थिए । फाइजले २१ बलमा ४ चौका र एक छक्का प्रहार गर्दै ३१ रनको योगदान दिएका थिए ।

चौथो विकेटको रुपमा मलेसियाले शर्विन मुनियान्दीलाई गुमायो । ३ रनमा खेलिरहेका उनी कमल सिह ऐरीको बलमा एलबिडब्लु आउट भए । यो कमलको टी–ट्वान्टी अन्तर्राष्ट्रियमा डेब्यु विकेट समेत हो ।

पाँचौ विकेटको रुपमा विरन्दीप सिंह आउट भए । उनलाई कमलले नै गरेको नवौं ओभरको अन्तिम बलमा गरेको लामो सटमा आसिफले शेखले क्याच गर्दै पेभिलियन फर्काएका थिए । उनले १८ बलमा २ चौका सहित १३ रनको योगदान दिए ।

त्यसपछि मैदान आएका अमिनुद्धीन राम्ली र अइनुल हाफिजले मलेसियाको इनिङ सम्हाले । अमिनुद्धीन र आफिजले ५० रनको साझेदारी गरे । तर, अमिनुद्धीन १४ औं ओभरको तेस्रो बलमा लङअफमा क्याच आउट हुन पुगे । उनी सन्दीप लामिछानेको ओभरमा लामो सट खेल्ने चक्करमा सोमपाल कामीको हातबाट क्याच हुन पुगेका थिए ।

अमिनुद्धीनले सर्वाधिक ४१ रनको योगदान दिए । उनले मात्र १८ बलको सामना गर्दै १ चौका र ५ छक्का सहित ४१ रन जोडेका हुन् । फित्रि शामले १४ रन जोडे । उनी सन्दीपको स्पेलको चौथो ओभरको पहिलो बलमा नै सन्दीप स्वयमले क्याच गर्दै फित्रिलाई सातौ विकेटको फेभिलियन फर्काएका थिए ।

सोही ओभरको पाँचौ बलमा सन्दीपले अइनुल हाफिजलाई बोल्ड आउट गर्दै मैदान बाहिर पठाए । मलेसियाका लागि आठौं विकेटको रुपमा मैदानबाट बाहिरिएका हाफिजलले ११ रन जोडे । धिरेन्द्रन मोगन २, मुहम्मद वाफिक १२ रनमा आउट हुँदा अनवर रहमान २ रनमा अविजित रहे ।

नेपालका लागि प्लेयर अफ दि म्याच बनेका सोमपाल कामी, कमल सिंह ऐरी र सन्दीप लामिछानेले समान तीन–तीन विकेट लिए । सोमपालले चार ओभर बलिङ गर्दै मात्र २० रन खर्चेर तीन विकेट लिएका हुन् ।

समान ओभर बलिङ गर्दै सन्दीपले ४२ रन खर्चेर तीन विकेट लिएका थिए । कमलले ३.१ ओभरमा १६ रन खर्चेर तीन विकेट लिए । त्यस्तै सुशन भारीले एक विकेट लिए ।

यस अघि टस हारेर पहिले ब्याटिङ गरेको नेपालले २० ओभरमा ७ विकेट गुमाएर २ सय १७ रन बनाएको थियो ।

नेपालले पहिलो विकेटको रुपमा ओपनर कुशल भुर्तेललाई गुमाएको थियो । भुर्तेललाई मोहम्मद आफिकले गरेको पाँचौ ओभरको पहिलो बलमा स्लिपमा रहेको साद अजिजले क्याच गर्दै पेभिलियन फर्काएका थिए ।

कुशलले १२ बलमा २ छक्का सहित १६ रनको योगदान दिए ।

त्यसपछि मैदान आएका कप्तान ज्ञानेन्द्र मल्लले अर्का ओपनर आसिफ शेखसँग ७३ रनको साझेदारी गरेका थिए । तर, उनी १२ औं ओभरको पहिलो बलमा लामो सट खेल्ने चक्करमा लङअनमा क्याच आउट हुन पुगे ।

अनवर रहमानको बलमा लङनमा रहेका मोहम्मद वाफिकले क्याच गर्दै मल्ललाई पेभिलियन फर्काएका थिए । मल्लले २५ बलमा एक चौका र ४ छक्का प्रहार गर्दै ४१ रन जोडे ।

सोही ओभरमा नेपालले तेस्रो विकेटको रुपमा ओपर शेखलाई गुमायो । आसिफ पाँचौ बलमा एलबीडब्लुको सिकार बन्न पुगे । ३२ बल खेलेका आसिफले समान ३ चौका र छक्काको मद्दतमा ४२ रनको योगदान दिएका थिए ।

चौथो विकेटको रुपमा नेपालले विकेटकीपर ब्याट्सम्यान विनोद भण्डारीलाई गुमायो । ८ रनमा खेली रहेका भण्डारी १६ औं ओभरको दोस्रो बलमा लामो सट खेल्ने चक्करमा लङअनमा शर्विन मुनियान्दीले क्याच गरेका थिए ।

पाँचौ विकेटको रुपमा उपकप्तान दिपेन्द्र सिंह ऐरी पेभिलिनय फर्किए । उनी १६ औं ओभरको चौथो बलमा कभरका कट विहाइन्ड आउट भएका थिए । ऐरीले १७ बलमा ५ चौका र एक छक्काको मद्दतमा ३३ रन जोडे ।

छैटौं विकेटको रुपमा मैदानबाट बाहिरिएका करण केसीले निकै नै आक्रमक ब्याटिङ गर्दै ४५ रन जोडे । उनले मात्र १३ बलमा ७ छक्का प्रहार गर्दै ४५ रन जोडेका थिए । करण साद अजिजले गरेको अन्तिम ओभरको पहिलो बलमा क्याच हुँदै पेभिलियन फर्किएका थिए ।

त्यसपछि मैदान आएका सोमपाल कामी दुई रनमा एलबीडब्लु आउट भए । कुशल मल्ल १० रनमा २ छक्का सहित १९ रनमा अविजित रहे ।

मलेसियाका लागि अनवर रहमान, फित्री शाम र साद अजिजले समान दुई–दुई विकेट लिए । त्यस्तै मोहम्मद आफिकले एक विकेट लिए ।

अब नेपालले फाइनलमा नेदरल्यान्ड्ससँग खेल्नेछ । फाइनल खेल शनिबार हुनेछ ।

नेपालले ४ खेलमा ३ जितसहित ६ अंक जोड्यो ।

नेदरल्यान्ड्स दोस्रो स्थानमा रहेर फाइनल पुगेको हो ।

नेदरल्यान्ड्सले ४ खेलमा ५ अंक जोड्यो ।

मलेसिया ४ खेलमा १ अंक जोडेर प्रतियोगिताबाट बाहिरिएको छ ।