किरण धनगढी एफसीको 'आइकोनिक' खेलाडी

काठमाडौं । नेपाल सुपर लिगको फ्रेन्चाईज क्लब धनगढी फुटबल क्लबले किरण चेम्जोङलाई आइकोनिक खेलाडीको रुपमा अनुबन्धन गरेको छ ।

धनगढीले बुधबार पत्रकार सम्मेलन गर्दै राष्ट्रिय फुटबल टिमका कप्तान किरणलाई आइकोनिक खेलाडीको रुपमा सार्वजनीक गरेको हो ।

पछिल्लो समय भारतको आईलिगमा पञ्जाबबाट खेलिरहेका किरण पहिलो संस्करणको एनएसएल धनगढीबाट खेल्ने पक्का भएको हो ।

उनी गत सिजन आईलिगकै उत्कृष्ट खेलाडी घोषित बनेका थिए । किरणकै नेतृत्वमा नेपालले भर्खरै थ्री नेसन्स कपको उपाधि जितेको थियो ।

धनगढीले मार्की खेलाडीको रुपमा विशाल राईलाई अनुबन्धन गरिसकेको छ ।

टिमको प्रशिक्षकमा युगल किशोर राई रहने क्लबले जनाएको छ । राष्ट्रिय फुटबल टिमका पूर्व सदस्य राईले एएफसीकाे ए लाईसेन्स प्राप्त समेत गरेका छन् । 

ग्रो ड्रिमर्सको स्वामित्व रहेको धनगढी एफसीका मालिक सुबास शाही हुन् । धनगढीले अक्सनमार्फत १४ खेलाडी क्लबमा अनुबन्धन गरिसकेको छ । टिमले तोपे फुजालाई मुख्य प्रशिक्षकको रुपमा अनुबन्धन गरिसकेको छ ।

किरणको आगमनसंंगै एनएसएलमा क्लबले उत्कृष्ट प्रर्दशन गर्ने मालिक सुवास शाहीले बताए । आफ्नो क्लबमा हट केकलाई अनुबन्ध गर्न पाउँदा उनले निकै खुसी व्यक्त गरे । उनले किरणको आगमनले टोली निकै बलियो र प्रतिस्पर्धी बन्नेमा विश्वस्त रहेको बताए ।

प्रशिक्षक राईले नयाँ फुटबल बिकाशका लागि फ्रेन्चाइजी सुरुवात भएकाले आफ्ना लागि पनि च्यालेन्ज रहेको बताए । उनले समय छोटो रहेकाले धर्यका साथ आफ्नो टोली राम्रो बनाउने लक्ष्य राखेकाे बताए ।

उनले भने, ‘आइकोनिक खेलाडीमा किरण र मार्की खेलाडीमा विशाल छन् । हामीसँग अब तयारी पनि कम छ । तर, हामी राम्रो फुटबल खेल्ने प्रयास गर्ने छौ । फुजासँगै मिलेर काम गर्ने छौ ।’

धनगढी एफसीको आइकोनिक खेलाडीमा अनुबन्ध भएपछि गोलरक्षक किरणले आफु ५ वर्षपछी घरेलु लिगमा फर्किन लागेको बताए । उनले लामो समयपछि घरेलु लिगमा फर्किन पाउँदा निकै उत्साहित भएको बताए ।

फ्रेन्चाइजले नेपाली फुटबलमा नयाँ मोड ल्याएको उनको बुझाइ छ । उनले अर्को समय लिग लामो समय र क्वालिटीको हुनेमा विश्वास व्यक्त गरे ।

उनले भने, ‘टोलीमा बिदेशी खेलाडी झनै राम्रो होस् । हाम्रो लक्ष्य सबै खेल जित्ने हुनेछ । तर, तयारीका लागि समय थोरै छ । कोरोनाको समयमा पनि प्रतियोगिता खेल्न पाएकोमा निकै खुसी छौ ।’