बराबरीमा रोकियो स्पेन

एजेन्सी । फिफा विश्वकप फुटबल छनौट अन्तर्गत युरोपियन छनौटको पहिलो खेलमा स्पेन बराबरीमा रोकिएको छ ।

बिहीबार राति भएको खेलमा स्पेन ग्रिससँग १-१ गोलको बराबरीमा रोकिएको हो ।

घरेलु मैदानमा सुरुवाती अग्रता जोगाउन नसक्दा स्पेन बराबरीमा रोकिएको हो ।

खेलको ३३ औं मिनेटमा अल्भारो मोराटाले गोल गर्दै स्पेनलाई अग्रता दिलाएका थिए ।

तर, खेलको ५७ औं मिनेटमा अनास्टासिओस बाकासेटासले पेनाल्टीमा गोल गर्दै ग्रिसलाई हारबाट जोगाए ।

यस बराबरीसँगै समूह 'बी' को स्पेन र ग्रिसले एक एक अंक जोडेका छन् ।

यसै समूहको अर्को खेलमा स्विडेनले जर्जियालाई १-० ले हराएको छ ।

स्विडेनको जितमा भिक्टर क्लासनले निर्णायक गोल गरे ।

भिक्टरले भेट्रान स्ट्राइकर ज्लाटन इब्राहिमोविचको पासमा गोल गरेका हुन् ।

जितसँगै स्विडेनले पहिलो खेलमै ३ अंक जोडेको छ ।