ह्वाइट हाउस सेमिफाइनलमा
धनगढी । हिमालयन ह्वाइट हाउस स्कुल धनगढीमा जारी चण्डिका ग्रुप लिटल फ्लावर प्रिमियर लिग (एलपीएल) क्रिकेटको सेमिफाइनलमा प्रवेश गरेको छ ।
सोमबार भएको खेलमा नेक्सस स्कुललाई ४ विकेटले पराजित गर्दै ह्वाइट हाउस अन्तिम चारमा पुगेको हो ।
संघीय प्रहरी इकाई कार्यालयको खेल मैदानमा नेक्ससले दिएको १ सय ४ रनको लक्ष्य ह्वाइट हाउसले १५ ओभरमा ६ विकेट गुमाएर पूरा गर्यो ।
ह्वाइट हाउसको जितमा दिपक बोहराले अविजित ४३ रन बनाए । नेक्ससका पप्पु रायले ३ विकेट लिए । खेलको प्लेयर अफ द म्याच ह्वाइट हाउसका गजेन्द्र बोहरा भए ।
यस अघि टस जितेर पहिले ब्याटिङ गरेको नेक्ससले १९ ओभर ५ बलमा सबै विकेट गुमाउँदै १ सय ४ रन बनाएको थियो । उसका लागि उत्तम थापाले ३२ रन बनाए । बलिङतर्फ ह्वाइट हाउसका गजेन्द्र बोहराले ५ विकेट लिए ।
यससँगै प्रतियोगितामा सेमिफाइनलमा पुग्ने तीन टिमको टुङगो लागेको छ । यसअघि बाल बाटिका र लिटल फ्लावर अन्तिम चारमा प्रवेश गरिसकेका छन् ।
प्रतियोगितामा १६ टिमको सहभागिता रहेको छ ।
विजेताले १ लाख २० हजार पाउने छन् ।
त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन् ।
उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन् ।
