घाइते भए एकिटिके

काठमाडौं। लिभरपुलका स्ट्राइकर ह्युगो एकिटिके शनिबार ब्राइटनविरुद्धको प्रिमियर लिग खेलमा आठ मिनेट पनि पूरा नखेल्दै बायाँ खुट्टामा चोट लागेपछि मैदान छाड्न बाध्य भए।

फ्रान्सका अन्तर्राष्ट्रिय खेलाडी एकिटिके खेलको तेस्रो मिनेटमै ब्राइटनका मिडफिल्डर जेम्स मिल्नरसँग ठोक्किँदा घाइते भएका थिए। उपचारपछि उनले फेरि खेल्न प्रयास गरे पनि निरन्तरता दिन सकेनन्। उनको स्थानमा कर्टिस जोन्स मैदानमा प्रवेश गरेका थिए।

लिभरपुलका प्रशिक्षक आर्ने स्लटले एकिटिकेलाई ‘डेड लेग’ भएको बताउँदै आवश्यक परे भोलि नै खेल्न सक्ने संकेत गरेका छन्। यसले चोट गम्भीर नभएको देखाउँछ।

एकिटिके अमेरिकामा ब्राजिल र कोलम्बियाविरुद्ध हुने मैत्रीपूर्ण खेलका लागि फ्रान्सको पछिल्लो टोलीमा पनि समावेश भएका छन्। यसअघि नै लिभरपुल टोलीमा मोहम्मद सलाह र अलिसन बेकर चोटका कारण अनुपस्थित छन्।