एलिसन ब्राजिली टिमबाट बाहिर

काठमाडौं । इङ्लिस क्लब लिभरपुलका मुख्य गोलकिपर एलिसन बेकर चोटका कारण ब्राजिल राष्ट्रिय टोलीबाट बाहिरिएका छन् र शनिबार हुने प्रिमियर लिग अन्तर्गत ब्राइटनविरुद्धको खेल पनि गुमाउने भएका छन्।

३३ वर्षीय एलिसन लिभरपुल टोलीसँगै ब्राइटनको मैदान एमेक्स स्टेडियममा हुने खेलका लागि यात्रा गरेका छैनन्। उनको स्थानमा जर्जियाली गोलकिपर जियोर्जी मामार्दाश्भिलीले पहिलो रोजाइका गोलकिपरका रूपमा खेल्ने अपेक्षा गरिएको छ।

लिभरपुलले एलिसनको चोटको प्रकृति सार्वजनिक गरेको छैन भने टोलीका मुख्य प्रशिक्षक आर्ने स्लटले पनि खेलअघि आयोजित पत्रकार सम्मेलनमा उनको फिटनेसबारे कुनै चिन्ता व्यक्त गरेका थिएनन्।

यसैबीच ब्राजिल राष्ट्रिय टोलीका प्रशिक्षक कार्लो एन्सेलोट्टीले एलिसनको स्थानमा गोलकिपर ह्युगो सोउजालाई टोलीमा समावेश गरेका छन्। ब्राजिलले अमेरिका भ्रमणका क्रममा फ्रान्स र क्रोएसियाविरुद्ध मैत्रीपूर्ण खेल खेल्ने कार्यक्रम रहेको छ।

एलिसन यसअघि मार्च १० मा यूईएफए च्याम्पियन्स लिग अन्तर्गत गालाटासरायविरुद्धको अन्तिम–१६ को पहिलो लेग पनि सामान्य चोटका कारण गुमाएका थिए।

तर उनले आइतबार टोटेनहमविरुद्धको बराबरी खेल र बुधबार गालाटासरायविरुद्ध ४–० को जितमा पुनः टोलीमा फर्किएका थिए। यसअघि अक्टोबर र नोभेम्बरमा ह्यामस्ट्रिङ चोटका कारण उनले लिभरपुलका आठ खेल गुमाएका थिए।

यस सिजन मामार्दाश्भिलीले लिभरपुलका लागि सबै प्रतियोगितामा १२ खेल खेलिसकेका छन्। हाल लिभरपुल प्रिमियर लिग तालिकाको पाँचौं स्थानमा छ र अर्को सिजन च्याम्पियन्स लिगका लागि स्थान सुरक्षित गर्ने लक्ष्यमा छ भने ब्राइटन १२औँ स्थानमा रहेको छ।