दीपेन्द्रसिंहले इयू टी–२० लिग बेल्जियम खेल्ने

काठमाडौं। नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरीले इयू टी–२० लिग बेल्जियम खेल्ने भएका छन्।

उनलाई जेबी ब्रुग्सले अनुबन्ध गरेको हो। जेबी ब्रजेज नेपाल प्रिमियर लिग (एनपिएल) टोली जनकपुर बोल्ट्स (जेबी) को लगानीकर्ता कम्पनी ड्रिम स्पोर्ट्सको स्वामित्वमा रहेको टोली हो।

जेबी ब्रुजेजले यसअघि पहिलो सिजनका लागि न्युजिल्यान्डका कलिन मनरोलाई अनुबन्ध गरेको थियो। ३९ वर्षीय ब्याटर मनरोले आइपीएलसहित विश्वका चर्चित लिग खेलेका छन्।

यस्तै, दक्षिण अफ्रिकाका ब्याटर सी भान डर डुसेनलाई पनि भित्र्याइसकेको छ। इयू टी–२० लिग बेल्जियमको पहिलो फ्रेन्चाइज क्रिकेट लिग हो। बेल्जियन क्रिकेट फेडरेसनले डेस्टिनो लिजेन्ड्स स्पोर्ट्स एलएलसीसँग साझेदारी गर्दै आयोजना गर्न लागेको लिग आगामी जुन ६ देखि १४ जुनसम्म आयोजना हुनेछ।

एक वर्षअघि घोषणा गरिएको लिगमा बेल्जियमका प्रमुख शहरहरू प्रतिनिधित्व गर्ने ६ फ्रेन्चाइज टिमहरूले राउन्ड रोबिन लिग चरण खेल्छन्। त्यसपछि शीर्ष चार टिमहरूले प्लेअफमा प्रतिस्पर्धा गर्छन्।

सहभागी टोलीमा जेबी ब्रुजेजसहित आन्थ्रोप एङकर्स, ब्रसेल्स, हेन्ट, लुभेन र लिइज रेड लायन्स छन्। यता आन्थ्रोपको स्वामित्व भारतका पूर्व राष्ट्रिय खेलाडी जाहिर खानले लिएका छन्।