सोमपालको अर्धशतकमा आर्मीको पहिलो जित

काठमाडौं । विभागीय टिम त्रिभुवन आर्मी क्लबले पहिलो संस्करणको काठमाडौं मेयर कप एकदिवसीय पुरुष क्रिकेट प्रतियोगितामा पहिलो जित दर्ता गरेको छ ।

टियु क्रिकेट मैदानमा सोमबार भएको खेलमा काठमाडौं मेयर-११ लाई ५ विकेटले पराजित गर्दै आर्मीले पहिलो जित निकालेको हो ।

काठमाडौंले दिएको १ सय ५६ रनको लक्ष्य आर्मीले २३ ओभर ५ बलमा ५ विकेट गुमाएर पूरा गर्यो ।

आर्मीको जितमा सोमपाल कामीले ८० रनको अर्धशतकीय इनिङ्स खेले । प्लेयर अफ द म्याच बनेका उनले ५१ बलमा ९ चौका र ६ छक्का प्रहार गरे ।

यस्तै कुशल मल्लले २३ रन जोड्दा भिम सार्कीले १६ रन बनाए ।

कप्तान विनोद भण्डारीले अविजित २० रन जोड्दा राजेश पुलामी ८ रनमा अविजित रहे ।

काठमाडौंका सन्दीप लामिछाने र विपिन खत्रीले २/२ विकेट लिए ।

यस अघि टस हारेर पहिले ब्याटिङ गरेको काठमाडौंले ४२ ओभर १ बलमा अलआउट हुँदै १ सय ५५ रन बनाएको थियो ।

काठमाडौंका लागि सौरभ खनालले सर्वाधिक ४२ रन बनाए । उनले ७४ बलमा २ चौका र २ छक्का प्रहार गरे ।

सन्दीप रजालीले ३७ रन जोड्दा खडक बोहराले १९ रन बनाए ।

त्यस्तै हरिशंकर साह १८ रनमा आउट हुँदा कप्तान सन्दीप लामिछाने १३ रन जोड्दा आउट भए ।

आर्मीका शाहब आलमले ३९ रन खर्चिएर ४ विकेट लिए । जितेन्द्र मुखियाले ३ विकेट तथा सोमपाल कामी, बिक्रम सोब र कुशल मल्लले १/१ विकेट लिए ।

जितसँगै आर्मीले २ खेलमा २ अंक जोडेको छ ।

आर्मी पहिलो खेलमा पराजित भएको थियो । आर्मी उद्घाटन खेलमा एपीएफसँग १ विकेटले पराजित भएको हो ।

काठमाडौंको यो पहिलो हार हो ।

काठमाडौंले पहिलो खेलमा बागमती प्रदेशलाई ९४ रनले हराएको थियो ।

काठमाडौंले २ खेलमा २ अंक जोडेको छ ।