विश्वकप खेल्ने या नखेल्नेबारे पाकिस्तानले अर्को हप्तासम्म निर्णय लिने

काठमाडौं। २०२६ को आईसीसी टी–२० विश्वकपमा पाकिस्तानको सहभागिताको बारेमा अनिश्चितता कायमै छ।

पाकिस्तान क्रिकेट बोर्ड (पीसीबी)का अध्यक्ष मोहसिन नक्वीले बोर्डलाई यस विषयमा अन्तिम निर्णय गर्न शुक्रबार वा अर्को सोमबार सम्मको समय दिएका छन्। नक्वीले सोमबार प्रधानमन्त्री शाहबाज शरीफसँग विस्तृत छलफलको लागि भेटेका थिए।

दुई दिन अघि मात्र नक्वीले सार्वजनिक रूपमा प्रतियोगितामा भाग लिनेबारे अन्तिम निर्णय सरकारले गर्ने बताएका थिए। सोही निर्णयको पालना बोर्डले गर्ने उनको भनाइ थियो।

नकवीले ट्वीट गरे,‘प्रधानमन्त्री शाहबाज शरीफसँग सकारात्मक भेटघाट भयो। मैले उहाँलाई आईसीसीका मुद्दाको बारेमा जानकारी गराएँ र उहाँले सबै विकल्पहरू खुला राख्दै समाधान खोज्न निर्देशन दिनुभयो। सहभागिताको बारेमा अन्तिम निर्णय शुक्रबार वा अर्को सोमबार लिइने सहमति भयो।’

विश्वकपको पूर्ण बहिष्कार पीसीबीले विचार गरिरहेको एक मात्र विकल्प होइन। सीमित विरोधको रूपमा टोलीले फेब्रुअरी १५ मा भारतविरुद्धको ‘हाई भोल्टेज’ खेलबाट पछि हट्न सक्ने अनुमान पनि गरिएको छ। यद्यपि, पीसीबीले यस सम्भावित कदमको बारेमा अहिलेसम्म आधिकारिक निर्णय सार्वजनिक गरेको छैन।

रोचक कुरा के छ भने नक्वीको उक्त घोषणाको भोलिपल्टै बोर्डले टी–२० विश्वकपको लागि पाकिस्तानको टोली घोषणा गर्‍यो । टोलीको घोषणाको बाबजुद पनि मुख्य छनोटकर्ता आकिब जावेदले प्रतियोगितामा पाकिस्तानको सहभागिता र यसको ढाँचाको बारेमा अन्तिम निर्णय सरकारमै रहने स्पष्ट पारे।

यदि पाकिस्तानले आफ्नो निर्णय अर्को हप्तासम्म गरे धेरै ढिलो हुनेछ। प्रतियोगितामा पाकिस्तानले पहिलो खेल फेब्रुअरी ७ मा कोलम्बोमा नेदरल्यान्ड्सविरुद्ध उद्घाटन खेल खेल्नेछ। यो अपेक्षित निर्णय मितिभन्दा चार दिन अगाडि मात्र हुनेछ।

मोहसिन नक्वीले बंगलादेशलाई प्रतियोगिताबाट बाहिर राख्ने आईसीसीको निर्णयको कडा विरोध गरेपछि पाकिस्तानको विश्वकप सहभागिताको अनिश्चितताको बनेको हो।

बंगलादेशले सुरक्षा चिन्ताको कारण देखाउँदै भारत यात्रा गर्न अस्वीकार गरेको थियो र वैकल्पिक स्थलको माग गरेको थियो। आईसीसीले यो मागलाई अस्वीकार गर्‍यो। आधिकारिक रूपमा स्कटल्यान्डलाई बंगलादेशको ठाउँमा समावेश गर्ने घोषणा गर्‍यो।

नकवीले यसमा कडा प्रतिक्रिया जनाउँदै आईसीसीले भारतको पक्षमा दोहोरो मापदण्ड अपनाएको आरोप लगाए। उनले यसलाई बंगलादेशमाथि घोर अन्याय भने र यस सन्दर्भमा पाकिस्तानको आफ्नै सहभागितामाथि प्रश्न उठाए।

नकवीले शनिबार भनेका थिए,‘तपाईं दोहोरो मापदण्ड अपनाउन सक्नुहुन्न। यो सम्भव छैन कि एउटा देशको हरेक शब्द स्वीकार गरियोस् र बाँकी देशहरूलाई पूर्ण रूपमा फरक व्यवहार गरियोस्। त्यसैले हामीले कडा अडान लिएका छौं। बंगलादेश क्रिकेटको एक महत्त्वपूर्ण हिस्सा हो र उनीहरूमाथि जे भयो त्यो गलत हो। उनीहरूले विश्वकप खेल्नुपर्थ्यो।’

यो उल्लेखनीय छ कि पाकिस्तानी टोलीले सम्पूर्ण प्रतियोगिताको लागि भारतको यात्रा गर्नेछैन। आफ्ना सबै खेलहरू श्रीलंकामा खेल्नेछ। बंगलादेशलाई पनि यही विकल्प दिनुपर्ने पाकिस्तानको तर्क छ।