बालोन डी’ओर विजेताको पेनाल्टी ‘मिस’

काठमाडौं। बालोन डी’ओर विजेता उस्मान डेम्बेलेका लागि बुधबार राति निराशाजनक रह्यो।

प्रारम्भिक पेनाल्टी र नजिकबाट आएको सुनौलो अवसर गुमाउँदा डिफेन्डिङ च्याम्पियन पेरिस सेन्ट–जर्मेन (पीएसजी) ले च्याम्पियन्स लिगमा न्युक्यासलसँग १–१ को बराबरी खेल्नुपर्‍यो।

यस बराबरीसँगै दुवै टोली लिग तालिकाको शीर्ष आठ बाहिर रहेर सिधै अन्तिम १६ मा पुग्न असफल भए। अब पीएसजी र न्युक्यासल दुवैले प्ले–अफ खेलेर अर्को चरणको टिकट काट्नुपर्नेछ।

खेल सुरु भएको एक मिनेट नपुग्दै पीएसजीले पेनाल्टी पाएको थियो। ब्राडली बार्कोलाले बायाँ पाखाबाट डिफेन्स भत्काउँदै अघि बढ्दा बल डिफेन्डरसँगको ट्याकलपछि बार्कोलाको हातमा लाग्दै पछाडि रहेका लुइस माइलीको हातमा ठोक्किएको थियो।

ह्यान्डबल अनायास देखिए पनि छोटो भीएआर समीक्षा पछि रेफ्री स्लाभ्को भिन्चिचले पेनाल्टी दिए। तर, डेम्बेलेले दायाँ कुनामा प्रहार गरेको बललाई गोलकिपर निक पोपले सानदार बचाउ गरे।

पीएसजीले भने आठौं मिनेटमा अग्रता लियो। ख्भिचा क्वारात्स्खेलियाको पासमा पेनाल्टी क्षेत्रको छेउबाट भिटिन्हाले कर्लिङ सटमार्फत गोल गरे। गत सिजन सबै प्रतियोगिता मिलाएर ३५ गोल गरेका डेम्बेलेले ४०औं मिनेटमा अर्को ठूलो मौका खेर फाले।

बायाँ पाखाबाट आएको क्रसमा उनले १० मिटर दूरीबाट हानेको बल क्रसबारमाथिबाट बाहिर गयो। पहिलो हाफको इन्जुरी समयमा जो विलकले गोल गर्दै न्युक्यासललाई बराबरीमा फर्काए।

खेलको अन्त्यतिर वैकल्पिक खेलाडी हार्भी बार्न्सले पाहुना टोलीका लागि जित दिलाउने अवसर गुमाए। बराबरीसँगै पीएसजी र न्युक्यासल दुवै टोलीको सिधा अन्तिम १६ यात्रा रोकिएको छ। अब उनीहरूलाई प्ले–अफको कठिन बाटो पार गर्नुपर्नेछ।