समूह विजेता बनेको गिताञ्जली क्वाटरफाइनलमा

काठमाडौं । गिताञ्जली कलेजले राजधानीमा जारी पाँचौ ढोरपाटन राष्ट्रिय खुला पुरुष भलिबल प्रतियोगिताको क्वाटरफाइनलमा स्थान बनाएका छन् ।

सोमबार भएको लिगको अन्तिम खेलमा जित पार्दै तीन खेलबाट ९ अंक बनाउँदै समूह 'ए' को विजेता बन्दै गिताञ्जलीले क्वाटरफाइनलमा स्थान पक्का गरेको हो ।

समूह विजेता बन्ने क्रममा गिताञ्जलीले ढोरपाटनको 'ए' टिमलाई २६–२४, २६–२४ र २५–१८ को सोझो सेटमा हरायो ।

सोमबार नै भएका अन्य खेलमा प्रदेश ४, ग्लासियर र बुढानीलकण्ठले सफलता हात पारेका छन् ।

दोहोरो जित निकालेको प्रदेश ४ ले क्वार्टरफाइनलमा स्थान बलियो बनाउँदा धादिङलाई २५–१९, २५–१९ र २५–१४ ले पराजित गर्यो । अर्को खेलमा चितवन टाइगर्सलाई २५–२१, २५–१६ र २५–१६ को सोझो सेटमा हरायो ।

यस्तै बुढानीलकण्ठले नेपाल छन्त्याल संघलाई २५–१८, २५–२३ र २५–१९ को सोझो सेटमा पराजित गर्यो । ग्लासियरले सूर्योदय कलेजलाई २५–१२, २५–१८ र २५–१४ ले हरायो ।