दिनेश सोपद्धारा वर्ष प्रशिक्षक विधा प्रायोजन

धनगढी । धनगढीमा हुने दोस्रो कैलाली अस्पताल सुदूरपश्चिम स्पोर्टस अवार्डको वर्ष प्रशिक्षक विधालाई दिनेश सोपले प्रायोजन गरेको छ ।

नेपाल खेलकद पत्रकार मञ्च कैलालीले चैत ६ गते आयोजना गर्ने अवार्डको वर्ष प्रशिक्षक विधालाई दिनेश ग्रुपको कैलालीको पहलमानपुरमा रहेको दिनेश सप एण्ड हाउसहोल्ड इण्ड्रष्ट्रिज प्रालिले प्रायोजन गरेको हो ।

पहिलो स्पोर्टस अवार्डमा पनि दिनेश सोपले वर्ष प्रशिक्षक विधालाई प्रायोजन गरेको थियो । दोस्रो संस्करणमा पनि सोपले विधा प्रायोजनालाई निरन्तरता दिएको छ ।

अवार्ड अन्तर्गतको यो विधाको नाम दिनेश सोप वर्ष प्रशिक्षक रहनेछ । दिनेश सोपका प्रवन्ध निर्देशक देवेन्द्र हमाल र नेपाल खेलकुद पत्रकार मञ्च कैलालीका सल्लाहकार दिपक उपाध्यायबीच प्रायोजन सम्बन्धी सम्झौता पत्रमा हस्ताक्षर भएको छ ।

सुदूरपश्चिममै पहिलो पटक कैलालीमा २५ करोडको लगानीमा दुई बर्ष अघि साबुन उद्योग सञ्चालनमा ल्याईएको छ । साबुन उद्योगले साबुनजन्य सामान डिर्टजेन्ट पाउडर र साबुन उत्पादन गर्दै आएको छ ।

दिनेश डिटर्जेन्ट पाउडर उत्पादन थालेको उद्योगले अहिले लुगा धुने साबुन उत्पादन गर्दै सुदूरपश्चिमका नौ वटै जिल्लामा बिक्री वितरण गर्दै आएको छ ।

अवार्डमा वर्ष २०७६ मा गरेको प्रदर्शनका आधारमा उत्कृष्ट पुरुष खेलाडी, उत्कृष्ट महिला खेलाडी, उत्कृष्ट युवा खेलाडी, उत्कृष्ट प्रशिक्षक, उत्कृष्ट पारा खेलाडी र वर्षको उत्कृष्ट टिम तथा खेलकुदमा पुर्र्याएको विशेष योगदानको कदर स्वरुप स्पेसल अवार्ड, पूरा जीवन खेलकुदमा समर्पित गर्ने एक पाका खेलकर्मीलाई लाइफटाइम अचिभमेन्ट अवार्ड, समर्थकको मतका आधारमा दिइने पिपल्स च्वाइस अवार्ड गरी ९ विधामा खेलाडी तथा खेलकर्मीलाई पुरस्कृत गरिनेछ ।

अवार्डको उत्कृष्ट खेलाडी पुरुष र महिला, उत्कृष्ट प्रशिक्षक र पिपल्स च्वाइस अवार्ड गरी ४ विधाका विजेतालाई नगद ३० हजार सहित ट्रफी मेडल र प्रमाणपत्र, वर्ष युवा खेलाडी, स्पेसल अवार्ड, लाईफ टाइम एचिभमेन्ट अवार्डका विजेताहरूलाई नगद २५ हजार सहित ट्रफी मेडल र प्रमाण पत्र दिईनेछ ।

यस्तै सुदूरपश्चिम आईकन महिला र पुरुष विधाका विजेतालाई नगद २० हजार सहित ट्रफी मेडल र प्रमाणपत्रका साथै विभिन्न विधाका विजेतालाई गिफ्ट ह्याम्पर प्रदान गरिने आयोजकले जनाएको छ ।