धनगढी । सुदूरपश्चिम प्रदेश लिग खेल्ने तयारीमा रहेको स्टार सिटी युवा क्लबलाई धनगढीको हसनपुरमा रहेको निसर्ग हस्पिटलले मुख्य प्रायोजन गरेको छ ।
स्टार सिटी र हस्पिटलबीच मंगलबार मुख्य प्रायोजन सम्झौता पत्रमा हस्ताक्षर भएको छ ।
सम्झौतासंगै क्लबको नाम निसर्ग स्टार सिटी युवा क्लब रहनेछ । यस्तै क्लबको सह–प्रायोजकमा एमएनएस ग्रुप रहेको छ ।
२०७१ सालमा स्थापना भएको क्लब दुई पटक जिल्ला च्याम्पियन बनेको छ । यसैबीच क्लबले प्रदेश लिग खेल्ने जर्सी सार्वजनिक गरेको छ ।
धनगढीमा जर्सी अनावरण कार्यक्रम गर्दै क्लबले जर्सी सार्वजनिक गरेको हो ।
स्टार सिटी युवा क्लबका अध्यक्ष कुमार शाहीको अध्यक्षतामा भएको कार्यक्रममा क्लबको मुख्य प्रायोजक निसर्ग अस्पतालका अध्यक्ष तिर्थ पन्त र अखिल नेपाल फुटबल संघका केन्द्रिय सदस्य प्रकाश विष्ट लगायतले जर्सी सार्वजनिक गरेका छन् ।
त्यसैगरी कार्यक्रममा क्लबले कुवेर सिंहको कप्तानीमा प्रदेश लिग खेल्ने टीमको पनि घोषणा गरेको छ ।
सुदूरपश्चिम प्रदेशमा प्रदेश लिग माघ २९ र फागुन १ गते हुने भएको छ ।
होम एण्ड अवेका आधारमा प्रदेशका दुई जिल्लाका च्याम्पीयन टीमहरुका बीचमा प्रदेश लिग हुनेछ । सुदूरपश्चिम प्रदेशमा एन्फामा आबद्ध दुई वटा जिल्ला संघ रहेका छन् ।
कैलाली र कञ्चनपुरमा रहेका जिल्ला च्याम्पीयनहरुले प्रदेश लिगमा सहभागीता जनाउनेछन् ।
कैलालीबाट जिल्ला च्याम्पीयन स्टार सिटी युवा क्लब भएको छ भने कञ्चनपुरबाट दिपज्योती युवा क्लब भएको छ ।
सुदुरपश्चिम प्रदेश लिग विजेता टोलीले देशका सात वटै प्रदेशका विजेताहरु बीचमा हुने प्रेसिडेन्ट कप खेल्नेछ ।
त्यसमा उत्कृष्ट चारमा पर्न सफल भएका चार प्रदेशहरुले राष्ट्रिय लिगमा सहभागीता जनाउनेछन् ।
सहिद स्मारण ए डिभिजन लिगका उत्कृष्ट ६ र प्रेसिडेन्डट कपका उत्कृष्ट चार गरी १० क्लबले राष्ट्रिय लिगमा सहभागीता जनाउने एन्फाले जनाएको छ ।
