चौतारा ब्याडमिन्टन : रमेश र सुरेन्द्र सेमिफाइनलमा

काठमाडौं । सिन्धुपाल्चोक जिल्लाको सदरमुकाम चौतारामा जारी तेस्रो चौतारा साँगाचोकगढी मेयरकप तथा प्रथम तोप–२१ ब्याडमिन्टन प्रतियोगिताको जिल्ला स्तरिय पुरुष एकल च्याम्पियनसिपको सेमिफाइनल समीकरण पुरा भएको छ ।

सोमबार भएको क्वाटरफाइनलमा जित निकाल्दै रमेश श्रेष्ठ, सुरेन्द्र श्रेष्ठ, अजय तामाङ र अभिषेक गुरुङले अन्तिम ४ मा स्थान बनाएका छन् ।

पहिलो क्वाटरफाइनलमा चौताराका रमेशले मेलम्चीका राजन श्रेष्ठलाई २१–१० र २१–१६ को सोझो सेटमा पराजित गरे । चौताराकै सुरेन्द्रले बलेफीका राज कुमार तामाङलाई २१–१६ र २२–२० को सोझो सेटमा पराजित गरे ।

तेस्रो क्वाटरफाइनलमा बलेफीका अजयले चौताराका प्रकाश श्रेष्ठलाई २१–१७, २२–२० र २१–१७ को सेटमा पराजित गरे । अन्तिम क्वाटरफाइनलमा मेलम्चीका नारायण लाल श्रेष्ठलाई २१–११ र २१–१० को सोझो सेटमा पराजित गर्दै त्रिपुरा सुन्दरीका अभिषेक गुरुङ पनि सेमिफाइनलमा प्रवेश गर्न सफल भए ।

अव, फाइनल प्रवेशका लागि रमेश र सुरेन्द्र तथा अजय र अभिषेक भिड्नेछन् । सेमिफानल खेल भोली (मंगलबार) हुनेछ ।

चौतारा साँगाचोकगढी नगरपालिकाको मुख्य प्रायोजनमा चलिरहेको प्रतियोगितामा जिल्ला स्तरका लागि पुरुष एकल र युगल तथा राष्ट्रिय स्तरका लागि पुरुष एकल गरि तीन विधमा प्रतिपर्धा गराईने आयोजकले जनाएको छ ।

पहिलो चरणमा जिल्लाका लागि पुरुष एकल र युगल तथा दोश्रो चरणमा राष्ट्रिय स्तरको पुरुष एकल प्रतियोयगता आयोजना गरिनेछ ।

राष्ट्रिय स्तरको पुरुष एकल तर्फको बिजेताले नगद १ लाख ११ हजार १ सय ११ प्राप्त गर्ने छन् भने उपबिजेताले नगद ५५ हजार ५ सय ५५ प्राप्त गर्ने छन् । यस्तै सेमिफाईनलिस्ट (तृतीय स्थान) दुई जनाले जनही १० हजार प्राप्त गर्ने छन् ।

यस्तै जिल्ला स्तरिय पुरुष एकलका बिजेताले नगद ३० हजार, उपबिजेताले नगद २० हजार र सेमिफाईनलिस्त दुईले जनही ५ हजार प्राप्त गर्ने छन् । युगल तर्फ बिजेता जोडीले ४० हजार, उपबिजेता जोडीले ३० हजार र सेमिफाईनलिस्ट दुई जोडीले ५÷५ हजार प्राप्त गर्ने प्रस बिज्ञप्तीमा जनाईएको छ ।

कोरोनाको महामारीका कारण प्रतियोगितामा प्रतिस्पर्धा गर्नबाट बञ्चित राष्ट्रिय खेलाडीहरुले पहिलो पटक यती ठुलो धनराशी रहेको प्रतियोगितामा प्रतिस्पर्धा गर्न गईरहेका छन् ।

कोरोना महामारिकाबीच नेपालमा ब्याडमिन्टन सुरु हुने यस प्रतियागिता पहिलो समेत हुनेछ । विगत ८ महिना यता नेपालमा कुनै पनि प्रतियोगिता आयोजना हुन पाएको छैन ।

प्रतियोगिताको प्रत्यक्ष प्रशारण खेलपाटी डटकमले गर्नेछ ।