सेप्टेम्बरको प्रिमियर लिगलाई फर्केर हेर्दा ...

एजेन्सी । प्रिमियर लिगको सेप्टेम्बर महिनाका खेल सकिएका छन् । कोभिड–१९ को कारणले लिगकाे खेल तालिका पनि प्रभावित हुन गयो ।

अधिकांश टिमले ३ खेल खेलिसकेका छन्, केहि टिमले २ खेल मात्र खेलेका छन् । अक्टोबर ५ सम्म ‘ट्रान्सफर विन्डो’ खुल्ला रहेकाले खेलाडीको सरुवा हुने क्रम जारीनै रहेको छ ।

त्यसैले सेप्टेम्बरसम्म टिमहरुकाे स्वरुप पूर्ण रुपमा परिवर्तन हुन सक्ने प्रवल संभावना रहेको छ । पहिलो महिनाका खेललाई फर्केर हेर्दा निम्न लिखित तथ्य हात लाग्छ ।

लिभरपुल दाबेदर

लिभरपुलले शतप्रतिशत जित सहित यस वर्षको उपाधिमा बलियो दाबेदारिता प्रस्तुत गरेको छ ।

'हामी उपाधिको रक्षा हैन, यसपटकको उपाधिलाई आक्रमण गर्ने हो ।' लिभरपुलका प्रशिक्षक योर्गेन क्लोपले सिजनको सुरुवातमै भनेका थिए ।

उनको अभिव्यक्ति आक्रमक देखिन्थ्यो । लिभरपुलका खेलाडीले प्रशिक्षकको अभिव्यक्ति अनुसारनै प्रदर्शन गरेका छन् ।

चेल्सी र आर्सनल जस्ता ठुला टिमलाई हराएर लिभरपुलले सहज रुपमा ९ अंकको साथ शीर्ष टोलीमा आफूलाई समावेश गरेको छ । नयाँ खेलाडीको रुपमा लिभरपुल आएका थियागो र जोटाले लिभरपुललाई उपाधि यात्रामा सहयोग पुर्याउने सुरुवाती महिनाले देखाउँछ ।

सिटीको ध्वस्त डिफेन्स

पहिलो खेलमा उल्भ्सलाई ३–१ ले पराजित गरे पनि म्यानचेष्टर सिटीको प्रर्दशन विश्वस्त बनाउने खालको थिएन । उल्भ्सले दोस्रो हाफमा निकै राम्रो आक्रमक खेल प्रर्दशन गरेको थियो । तर दुर्भाग्यवस १ गोलमात्र गर्न सक्यो ।

लेस्टरसंगको दोस्रो खेलमा सिटीको डिफेन्स लाइन उजागर बन्यो । सोही कारण सिटी ५–२ ले पराजित बन्यो । डिफेन्स लाइन बलियो बनाउन प्रत्येक बर्ष करोडौ पाउण्ड रकम सिटीले खर्च गर्छ । तर समस्या सुल्झिदैन । प्रशिक्षक पेप ग्वार्डीओला निरन्तर पिडित छन् ।

कमजोर डिफेन्सकै कारण सिटीले नयाँ सिजन फेरि ५ करोड ५० लाख युरो खर्च गरेर पाेर्चुगलका रुबेन डियाजलाई किनेको छ । के डियाजले सिटीको डिफेन्सलाई सुधार गर्न सक्लान् ? हेर्न बाँकी छ ।

सेफिल्ड ‘सेकेन्ड सिजन सिन्ड्रोम’को सिकार

सेफिल्ड युनाईटेडको प्रिमियर लिगमा यो दोस्रो बर्ष हो । च्याम्पियनसिपबाट प्रिमियर लिगमा प्रवेश गर्ने टिमलाई शीर्ष डिभिजनमा प्रर्दशन गर्न निकै गाह्रो हुन्छ । अघिल्लो वर्ष सेफिल्डले नवौं स्थानमा रहदै लिगको अन्त्य गरेको थियो भने १३ खेलमा क्लिन सिट राखेको थियो ।

तर यस वर्ष सुरुको ३ खेल हेर्दा सेफिल्ड ‘सेकेन्ड सिजन सिन्ड्रोम’को सिकार हुन पुगेको देखिन्छ । सेफिल्ड सुरुवातै तीनै खेलमा पराजित बन्न पुगेको छ । यसक्रममा उनले एक गोल फर्काउन पनि असफल बनेको छ ।

चल्ला त एन्सेलोटीको जादु ?

कार्लोस एन्सेलोटी विश्व प्रशिद्ध प्रशिक्षक हुन । उनले युरोपका विभिन्न लिग सहित च्याम्पियन्स लिग जितिसकेका छन् । गत वर्ष उनी एभर्टनमा आबद्ध भए । एभर्टन सधैं लिभरपुलको छायाँमा पर्ने टिमले चिनिन्छ ।

तर यस सिजन प्रिमियर लिगका सुरुवाती तीन खेल हेर्दा एन्सेलोटीले एभर्टनले छुट्टै पहिचान बनाउने देखिन्छ । एभर्टनले सुरुवाती तीन खेलमा शतप्रतिशत जित सहित तालिकाको शीर्ष स्थानमा छ । फरवार्ड काल्भर्ट लुइनले ३ खेलमा ५ गोल गरेर सबैको ध्यान तानेका छन् ।

नफेरिएको म्यानचेष्टर युनाइटेड

पहिलो महिना दुई खेल खेलेको म्यान्चेष्टर युनाइटेडको प्रर्दशन निकै कमजोर देखियो । पहिलो खेलमा क्रिस्टल प्यालेससंग ३–१ ले हारेको युनाइटेड दोस्रो खेलमा ब्राइटनबिरुद्ध कठिन जित निकाल्यो ।

त्यो पनि अन्तिम मिनेटमा पाएको पेनाल्टी गोलमा । खेललाई नियालेर हेर्दा ब्राइटनका धेरै प्रहार पोलमा लागेर फर्किएको थियो । युनाइटेडलाई भाग्यले पनि साथ दिएको देखिन्थ्यो ।

खर्चिलो चेल्सीको पुरानै शैली

चेल्सीले यस सिजन नयाँ खेलाडीमा २० करोड ४७ लाख पाउन्ड खर्च गरेको छ । प्रिमियर लिग मात्र नभएर युरोपेली क्लब फुटबलमा सर्वाधिक खर्चिलो टिम हो, चेल्सी ।

काेरोनाले युरोपेली क्लबहरुले वित्तिय संकट भोगिरहेका छन् । तर रुसी अर्वपतीले चेल्सीमा पैसा खन्याउन कुनै कमी गरेका छैनन । तर चेल्सीमा पुरानै कमजोरी यथावत छ ।

डिफेन्सिभ खेल र गोलकिपरको बारम्बारको गल्तीले चेल्सीका लागि नयाँ सिजनको पहिलो महिना सुखद रहेन । चेल्सीले ३ खेलमा एक जित सहित मात्र ४ अंक बटुल्न सक्यो ।