‘नेयमार फर्कन भन्दा मेस्सी पीएसजी आउन सम्भव’

एजेन्सी । एजेन्ट वेङ्गर रिबेरोले नेयमार बार्सिलोना फर्कन ईच्छुक नरहेको बताएका छन् ।

उनले नेयमार बार्सिलोना फर्कने भन्दा लियोनल मेस्सी पेरिस सेन्ट जर्मेन (पीएसजी) आउने सम्भावना बढी रहेको बताए ।

यस सिजनको सुरुवातमा नेयमार १ सय ३६ मिलियन पाउण्डमा नाउ क्याम्प फर्कने देखिएको थियो ।

पीएसजी च्याम्पियन्स लिगको फाईनल प्रवेश गर्नु र बार्सिलोनाको खस्कदो नतिजाका कारण नेयमारले पीएसजीमै बस्ने मन बनाएका छन् ।

एजेन्ट रिबेरोले २८ बर्षिया फरवार्ड कम्तीमा दुई बर्ष फ्रान्समा बस्न चाहेको बताए ।

ब्राजिलको मासिक खेल पत्रिकालाई उनले भने, ‘चोटका कारण उनी त्यो समय निकै निराश थिए ।’

‘त्यो समय उनी पीएसजी छाड्न चाहन्थे । उनी बार्सिलोना वा रियल मड्रिडसंग जोडिन चाहन्थे । तर वर्तमानमा उनी यही बस्न चाहन्छन् । उनी यही रमाईरहेका छन् ।’ उनले थपे ।

‘म उनीसंग मजाक गर्छु । उनी प्रकाशको शहरमा छन् । जहाँ जो कोही अडिन चाहन्छ । फ्रान्सको खानाको आनन्द लिईरहेका छन् । परिवार र साथीसंग एक सुन्दर घरमा बसेका छन् । सबैभन्दा राम्रो क्लबबाट खेलिरहेका छन् । एक ब्यक्तिलाई चाहिने र मन पर्ने सबै चिज छ ।’ उनले भने ।

‘उनले के कारणले पीएसजी छाड्ने ?’ उनी प्रश्न गर्छन् ।

‘नेयमार खुसी छन् । मलाई लाग्छ, उनी कम्तिमा दुई बर्ष पीएसजीमा बस्नेछन् ।’ रिबेरोले भने ।

‘आजको दिनमा निशंकोच भन्न सकिन्छ, नेयमार बार्सिलोना फर्कन भन्दा मेस्सी पीएसजी आउन सजिलो छ ।’ उनले भने, ‘म गम्भिर छु, म कतारको आर्थिक शक्तिमा कुनै शंका गर्दिन ।’

च्याम्पियन्स लिगमा लज्जास्पदक पराजयपछि मेस्सी बार्सिलोना छाड्न चाहेका छन् ।

च्याम्पियन्स लिगको क्वार्टरफाईनल खेलमा बार्सिलोनाले बायर्न म्युनिखसंग ८–२ ले पराजित भएको थियो ।