बार्सिलोनाको मुख्य प्रशिक्षकमा कोम्यान

एजेन्सी । स्पेनिस क्लब बार्सिलोनाले टिमको मुख्य प्रशिक्षकमा रोनाल्ड कोम्यानलाई नियुक्त गरेको छ ।

बार्सिलोनाले बुधबार नेदरल्यान्ड्सका प्रशिक्षक कोम्यानलाई मुख्य प्रशिक्षक नियुक्त गरिएको जनाएको छ ।

डच टिमको मुख्य प्रशिक्षक समेत रहेका कोम्यानले बार्सिलोनासँग दुई वर्षको सम्झौता गरेका छन् ।

५७ वर्षीय कोम्यान बार्सिलोनाका पूर्व डिफेन्डर समेत हुन् । उनले क्याटलान क्लबबाट सन् १९८९ देखि १९९५ सम्म खेलेका थिए । 

कोम्यानले बार्सिलोनालाई चार लिग उपाधि र एक युरोपियन कप जिताउन महत्वपूर्ण भुमिका खेलेका थिए । ६ सिजन क्लबमा रहदा उनले २ सय ५४ खेलमा ८३ गोल गरेका थिए । 

बार्सिलोनाले मुख्य प्रशिक्षक क्वेक सेटिनलाई बर्खास्त गरेको दुई दिन पछि कोम्यानलाई टिम हेर्ने जिम्मेवारी दिएको हो ।

बार्सिलोनाले सोमबार सेटिनलाई बर्खास्त गरेको थियो ।

पोर्चुगलको लिस्बनमा गत शुक्रबार राति बार्सिलोना बायर्नसँग ८-२ गोल अन्तरले पराजित भएको थियो ।

बार्सिलोनाले गत जनवरीमा सेटिनलाई मुख्य प्रशिक्षक नियुक्त गरेको थियो ।

अर्नेस्टो भालभर्डे बर्खास्त गर्दै बार्सिलोनाले ६१ वर्षीय सेटिनलाई टिमको जिम्मेवारी दिएको थियो ।

तर, बार्सिलोनाले खराब प्रदर्शन गरेपछि सेटिन ७ महिनामै बर्खास्तमा परेका हुन् ।

सेटिनको नेतृत्वमा बार्सिलोनाले यस सिजन ला लिगाको उपाधि समेत जित्न असफल भएको थियो ।

सेटिनको नेतृत्वमा बार्सिलोनाले २५ खेल खेलेको छ । जसमा १६ जित, पाँच हार र ४ बराबरी रहेको छ ।