विश्रामको मौका पाए - सन्दीप

काठमाडौं । नेपाली राष्ट्रिय टोलीका लेग स्पिनर सन्दीप लामिछानेले कोरोना भाईरसको कारण लामो समय राष्ट्रिय तथा अन्तर्राष्ट्रिय क्रिकेट नहुँदा आफुले पर्याप्त विश्रामको मौका पाएको बताएका छन् ।

क्यारेबियन प्रिमियर लिग (सीपीएल) क्रिकेट खेल्न वेष्ट इण्डिज जान अघि बुधबार आयोजित पत्रकार सम्मेलनमा बोल्दै सन्दीपले कोरोनाको कारण आफुले विश्रामको अवसर पाएको बताएका हुन् ।

'यो राम्रो ब्रेक (विश्राम) थियो । नेपालसहित विश्वभरका सबै खेलाडी मानसिक रुपमा थकित थिए होला । सबै खेलाडीसँगै मेरो लागि समेत राम्रो ब्रेक मिल्यो ,' सन्दीपले भने ।

नेपाली क्रिकेटका ग्लोबल आईकन सन्दीप सीपीएल क्रिकेट खेल्न बिहीबार वेष्ट इन्डिज प्रस्थान गर्दैछन् ।

चार्टर्ड फ्लाइटमार्फत दक्षिण कोरिया, अमेरिका हुँदै सन्दीप वेष्ट इन्डिज पुग्नेछन् । त्यहाँ पुगेपछि सन्दीप १४ दिनको क्वारेन्टिनमा बस्नेछन् ।

सन्दीपले लामो समयपछि क्रिकेटमा फर्किन पाउँदा आफु उत्साहित रहेको समेत बताए ।

'प्रतियोगितालाई लिएर निकै उत्साहित छु । आशा छ मसँगै सारा नेपाली उत्साहित हुनुहुन्छ,' सन्दीपले भने, 'क्रिकेट फर्किएको छ । प्रतियोगितामा जति हुन सक्छ राम्रो प्रदर्शन गर्ने कोशिस गर्नेछु । पहिलेको भन्दा पनि दोब्बर उत्साहित छु ।'

यस सिजन सन्दीपले जमैका तलावाजबाट खेल्ने छन् । उनी लगातार तेस्रो सिजन सीपीएल खेल्न लागेका हुन् । ड्राफ्टबाट सन्दीपलाई जमैका तलावाजले ९० हजार अमेरिकी डलरमा अनुबन्ध गरेको थियो । सीपीएलमा यो सन्दीपको अहिलेसम्म कै सर्वाधिक महँगो मूल्य हो ।

यस वर्षको सीपीएल अगष्ट १८ बाट हुँदैछ । ट्रिनिडाड एन्ड टोबेगोमा हुने प्रतियोगिता सेप्टेम्बर १० सम्म हुनेछ ।

सन्दीपले कोरोनाको कारण लकडाउन हुँदा आफुले धेरै कुरा सिकेको समेत बताए ।

'नियमित कामबाट एक्कासी छुट्दा गाह्रो हुन्छ । तर, तपाई जस्तोसुकै परिस्थिको सामना गर्न तयार हुनुपर्छ,' सन्दीपले भने, 'यस्तो समयले धेरै कुरामा सहयोग गर्छ । आफुले के गर्ने के नगर्ने, आफ्नो कमजोर पक्षमा सुधार गर्ने, फिटनेस र बडी मेन्टेन गर्ने गर्न सकिन्छ । मैले पनि त्यही नै गरें ।'

कोरोनाको कारण सन्दीप झन्डै ४ महिनाबाट मैदान बाहिर रहेका छन् । यस समयमा सन्दीपले नेपालका विभिन्न स्थानको भ्रमण गरे । लकडाउन सुरु भएपछी सन्दीपले परिवारसँग लामै समय बिताउने मौका पाए ।

लकडाउनमा सदीपले आफ्नो केहि गित सार्वजनिक गरेका थिए । तिमि नै छौ, समर्पित, आज फेरी, हारे म जस्ता आफुले गाएको गित युटुबबाट सार्वजनिक गरेका थिए ।

'लकडाउन खुकुलो भएपछी भने त्रिवि मैदानमा अभ्यास गर्थें । धेरै समय गर्न नपाए पनि आफ्नो लय गुम्न दिईनँ,' उनले थपे, 'सुरु सुरुमा साथीहरुसँग बसेर गित पनि लेखें । यो समय
शुभचिन्तकसँग अन्तरक्रिया गर्ने मौका पनि मिल्यो । धेरै समय संगीतमा बित्यो । संगीत मेरो एक पाटो हो जसले मलाई रिफ्रेस बनाउँछ ।'

यस्तै सन्दीपले यस समयमा आफु मानसिक र भावनात्मक रुपमा बलियो बनेको समेत बताए ।

'पहिले म अलि भावुक थिएँ । यो समयमा आफुलाई मानसिक र भावनात्मक रुपमा बलियो बनाएको छु । कतिपय कुरा आफ्नो नियन्त्रणमा हुँदैन त्यसमा समय खेर फालिन,' सन्दीपले भने ।