एजेन्सी । लण्डन क्लब चेल्सीले फरवार्ड ओलिभर जिराउडसंग सम्झौता नविकरण गरेको जनाएको छ । उसले फ्रान्सेली फरवार्डलाई थप एक सिजन स्टामफोर्ड ब्रिज क्लबमै राख्ने निर्णय भएको बताएको हो ।
नयाँ सम्झौतासंगै जिराउड सन् २०२१ सम्म चेल्सीमै रहनेछन् । उनले तेस्रो पुरा सिजन समेत चेल्सीबाटै खेल्ने पक्का भएको छ ।
उनी सन् २०१७-१८ को मध्य सिजनमा लण्डन क्लब आर्सनलबाट चेल्सी आएका थिए ।
‘चेल्सीसंग आफ्नो यात्रा र रोमाञ्चकता जारी राख्न पाउँदा खुसी छु । आफ्नो टिमका साथीसंग प्रतिस्पर्धात्मक फुटबल खेल्न र आनन्द लिनका लागि अब धेरै प्रतिक्षा गर्न सक्दिन । फेरी चेल्सीको जर्सी लगाउन आतुर छु । खासमा स्टामफोर्ड ब्रिजमा प्रशंसकका अगाडी देखिन उत्सुक छु ।’ उनले भने ।
उनी पछिल्लो समय चेल्सी छाड्ने मनसाय बनाईरहेका थिए । ईटालियन क्लब ईन्टर मिलानसंग उनी जोडिएका थिए ।
पछिल्लो अनुबन्धनले स्वतन्त्र रुपमा जिराउडलाई गुमाउने अवस्थाबाट चेल्सीले राहत महशुश गरेको छ । कोरोनाका कारण प्रभावित बन्ने खेलाडी सरुवा बजारमा समेत चेल्सीलाई स्थिर बन्न सहयोग पुग्नेछ ।
कोरोनाले सिजन अबरुद्ध हुनुअघि जिराउडले चेल्सीबाट १३ खेलमा उत्रन पाएका थिए । उनले तीन गोल समेत गरेका थिए ।
अबरुद्ध सिजन सुरु हुने तयारी भईरहेको समय चेल्सीलाई जिराउड महत्वपूर्ण बन्न सक्छन् । उनले चोट बोकेका टोमी अब्राहमको अभावलाई पुर्ती गर्न सक्नेछन् ।
‘चेल्सीमा मेरो आगमनसंगै जिराउड ब्यवासयीक रुपमा र व्यक्तिगत रुपमा प्रभावित बनाउन सफल छन् ।’ प्रशिक्षक फ्रान्क लाम्पार्डले भनेका छन्, ‘मैदानमा टिमलाई सहयोग गर्न उनीसंग धेरै राम्रो क्षमता छ । उनको अनुभवले धेरै युवा खेलाडीलाई सहयोग पुगेको छ । उनलाई अर्को सिजन निरन्तरता दिन पाउँदा धेरै खुसी छु ।’
सन् २०१८ को विश्वकप विजेता टिमका सदस्य जिराउडले चेल्सीबाट ७६ खेलमा अवसर पाएका छन् । आर्सनलबाट जिराउडले तीन एफ ए कप र तीन कम्युनिटी सिल्ड जितेका थिए ।
