एजेन्सी । इंग्लिस प्रिमियर लिग क्लबले मंगलबारबाट सानो समूह बनाएर प्रशिक्षण थाल्ने भएका छन् ।
प्रिमियर लिग क्लबको सोमबार बसेको बैठकले कोरोना भाईरसको महामारीपछि रोकिएको प्रशिक्षण मंगलबारबाट गर्ने निर्णय गरेको हो ।
प्रिमियर लिगको 'प्रोजेक्ट रीस्टार्ट' अन्तर्गत पहिलो कदमको रुपमा मंगलबारबाट प्रशिक्षण थाल्ने निर्णय गरिएको बताईएको छ ।
तर, खेलाडीले सामाजिक दुरी कायम राख्नु पर्नेछ । एक अर्काविरुद्ध सम्पर्क गर्न पाउने छैनन् ।
कोरोनाको कारण गत मार्चबाट प्रिमियर लिग स्थगित गरिएको छ । तर, प्रिमियर लिग जुनबाट सुचारु गर्ने तयारी गरिएको छ ।
प्रिमियर लिगका २० क्लबले अब यस सिजन ९२ खेल खेल्न बाँकी रहेको छ ।
यस सिजन लिभरपुल उपाधि नजिक रहेको छ । लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ ।
लिभरपुलको ८२ अंक रहदा सिटीको ५७ अंक रहेको छ । यस सिजन लिभरपुललाई ऐतिहासिक उपाधि जित्ने अवसर रहेको छ ।
