च्याम्पियन्स लिग र युरोपा लिग अगष्टमा सक्ने तयारी

एजेन्सी । युरोपियन फुटबल एसोसियसन (युईएफए) का अध्यक्ष एलेक्जेन्डर सेफ्रिनले यस सिजनको च्याम्पियन्स लिग र युरोपा लिग अगष्टमा सक्ने तयारी भईरहेको बताएका छन् ।

अध्यक्ष सेफ्रिनले बिनस्पोर्ट्ससँग कुरा गर्दै कोरोना भाईरसको कारण स्थगित २०१९/२० को सिजन अगष्टमा सक्ने तयारी भएको बताएका हुन् ।

विश्वभर फैलिएको कोरोनाको कारण च्याम्पियन्स लिग र युरोपा लिगसहित विश्वका सम्पूर्ण खेलकुद गतिविधि गत मार्चबाट स्थगित गरिएको छ ।

'हामीसँग एक आइडिया छ तर, मिति पुष्टि गर्न हामीले युईएफएको कार्यकारी कमिटिको निर्णय पर्खनु पर्छ । म भन्न सक्दछु कि युरोपियन सिजन समाप्त हुनेछ । यदि सबै कुरा अहिलेकै जस्तो भए अगष्टमा,' सेफ्सेरिनले भने ।

च्याम्पियन्स लिग र युरोपा लिगमा अन्तिम १६ को खेलहरु बाँकी रहेको छ ।

'म पक्का छु कि हामी युरोपियन सिजन समाप्त गर्न सक्दछौं र यसको अर्थ युईएफएको प्रतिस्पर्धा हो,' उनले थपे ।

कोरोनाकै कारण फ्रेन्च लिग वान, डच लिग र बेल्जियमको लिग रद्द भईसकेको छ ।

जर्मनीको बुन्डेसलिगा भने शनिबारबाट बन्द रंगशालामा सुचारु भएको छ ।

प्रिमियर लिग, सिरी ए र ला लिगा आगामी जुनबाट सुचारु गर्ने तयारी भईरहेको छ ।