एजेन्सी । ब्राजिलका पूर्व फरवार्ड एडिलसनले आफु नेयमार, लियोनल मेस्सी र क्रिस्टियानो रोनाल्डो भन्दा उत्कृष्ट खेलाडी भएको बताएका छन् ।
विश्वकप विजेता फरवार्डले एक टेलिभिजन बोल्दै आफु ब्राजिलका नेयमार, अर्जेन्टिनाका मेस्सी र पोर्चुगलको रोनाल्डो भन्दा उत्कृष्ट भएको दाबी गरेका हुन् ।
आफुले विश्वकप जितेको तर नेयमार, मेस्सी र रोनाल्डोले उक्त सफलता प्राप्त गर्न नसकेको उनको भनाई छ ।
'मैले नेयमारले भन्दा राम्रो खेलेको छु । म भन्दा राम्रो हुन उसले विश्वकप जित्न जरुरी छ । मेरो भन्दा मेस्सीको व्यक्तित्व राम्रो छ । उसले पनि विश्वकप जित्न जरुरी छ,' एडिलसनले भने,'रोनाल्डोको मात्र शक्ति हो । उसले दुवै खुट्टाले राम्रो प्रहार गर्न सक्छन् । तर, म उ भन्दा स्किल भएको खेलाडी हुँ ।'
४९ वर्षीय एडिलसनले ब्राजिलका लागि सन् २००२ को विश्वकप जितेका छन् । उनले ब्राजिलका लागि २१ खेल खेलेका छन् ।
एडिलसनले ब्राजिलियन क्लबबाट चार लिग उपाधि समेत जितेका थिए। तर, उनी बालोन डी'ओर अवार्डको मनोनयनमा भने पर्न सकेनन् ।
मेस्सीले कीर्तिमानी ६ र रोनाल्डोले पाँच पटक बालोन डी'ओर अवार्ड जितेका छन् । अवार्डका लागि मनोनयनमा परेपनि नेयमारले अवार्ड जित्न सकेका छैनन् ।
