एजेन्सी । स्पेनिस क्लब भिल्ला रियल र गेटाफेले म्याच फिक्सिङ आरोप अस्वीकार गरेका छन् ।
गत सिजनको ला लिगामा दुई टोलीबीचको खेलमा म्याच फिक्सिङ भएको हुन सक्ने भन्दै प्रहरीले अनुसन्धान सुरु गरेपछि दुवै क्लबले आरोपलाई अस्वीकार गरेका हुन् ।
गत सिजन भिल्ला र गेटाफेबीच २-२ गोलको बराबरीको खेलमा म्याच फिक्सिङ भएको भन्दै प्रहरीले अनुसन्धान गरिरहेको छ ।
तर, दुवै क्लबले विज्ञप्ति निकाल्दै म्याच फिक्सिङमा संग्लग्न नभएको दाबी गरेका छन् ।
'भिल्ला रियल र यसको पहिलो टोलीले आफुलाई लगाएको आरोपलाई पूर्ण रूपमा अस्वीकार गरेको र गत सिजनको अन्तिम दिन गेटाफविरुद्धको खेलमा म्याच फिक्सिङमा संलग्न भएको आरोपलाई स्पष्ट रूपमा इन्कार गर्न चाहन्छ,' भिल्लाले जारी गरेको विज्ञप्तिमा भनिएको छ ।
गत सिजन भ्यालेन्सियालाई पछि पार्दै च्याम्पियन्स लिगमा छनोट हुन् गेटाफेलाई अन्तिम खेलमा भिल्ला रियललाई हराउनु पर्ने थियो । भिल्ला रियलका लागि भने महत्वहीन खेल थियो ।
तर, त्यहिँ दिन भ्यालेन्सियाले रियल भालाडोलिटलाई २-० ले थियो । जसको कारण भिल्लालाई हराए पनि गेटाफेको च्याम्पियन्स लिग पुग्ने सम्भावना सकिएको थियो ।
गेटाफेले पनि उक्त खेलमा म्याच फिक्सिङ नभएको जनाएको छ ।
'यस विषय र यस प्रकारको कार्यमा संलग्नता भएको भन्नेमा इन्कार गर्न चाहन्छ,' गेटाफेले जारी गरेको विज्ञप्तिमा भनिएको छ ।
गत सिजन प्रहरीले ला लिगामा म्याच फिक्सिङ गरेको आरोपमा स्पेनिस क्लबका खेलाडी, पूर्व खेलाडी र क्लबका पदाधिकारीहरुलाई पक्राउ गरेको थियो ।
प्रहरीले रियल मड्रिडका पूर्व खेलाडी राउल ब्राभो, रियल भालाडोलिटका बोर्जा फर्नान्डेज, गेटाफेका सामुएल अलन्सो, डिपोर्टीभो ला करुनाका लोपेज मोन्टाना र कार्लोस अराण्ड लगायतका खेलाडी पक्राउ गरेको थियो ।
